ARGIA.eus

2022ko azaroaren 28a

Eragileen plaza!

SORTU KONTUA
2022-11-23 16:24

Azkaingo AEK-ko ikasleek abiatu dute irratsaioa eta ARGIAren webgunean irekitako blogean paratzen dute. Ondoren, material hori erabiltzen dute eskolan beste ariketa batzuk egiteko. (Argazkia: Azkaingo AEK)

[Itsaso Zubiria Etxeberria] Gau eskolatik plazara, plazatik oihan-zolara, oihan-zolatik mazeletara, mazeletatik mendi-kaskora, mendi-kaskotik uhinetara… euskara zabaltzen ari gara”. Azkaingo AEK-ko ikasleen bloga. Hori da ARGIAn sortu zaharra ez den blog berriaren aurkezpena. Azkaingo gau eskolako ikasleek euskara praktikan jartzeko duten formula berria da irratsaioa eta lehen hiru saioak zintzilik daude.

B1 eta B2 mailako ikasleek egiten dute lana, baina hastapen mailetakoek ere beren aurkezpentxoa egiteko tartea izaten dute. Dakitena erabiltzen hasi eta hizkuntza lau pareten artetik ahora eta kalera ateratzeko. Azkaine, Oiartzun, Tafalla ala Gasteiz, oso panorama soziolinguistiko desberdinetan bizi gara Euskal Herrian eta jakitun Azkainen ez dela hain erraza euskara praktikan jartzea, Jon Olano eta Ibai Trebiño irakasleek beste sistema bat xerkatu zuten ikasleak euskaraz ari daitezen: irratsaioa. Ez bakarrik beraiek entzuteko, ARGIAn blog bat ireki eta sortutako materiala bertan zintzilikatzeko, publiko.

“Ikasleek dute hizketagaia hautatzen. Gidoi txiki bat prestatzen dute, ideia garrantzitsuak paperean idatzi eta hasten da grabaketa”, dio Trebiñok. Gustura egiten dute. Blogean oraindik entzungai hiru saio baino ez badaude ere, laugarren bat bidean da eta beste gehiago ere etorriko dira.

“Material honek askorako ematen digu. Ez da euskara praktikan jartzea soilik, grabazioa amaitu ondotik ikasleek entzun egiten dute, egindako akatsak identifikatu eta hori baliatuz eskolan beste ariketa batzuk egiteko balio izaten digu”, azpimarratu du irakasleak.

Herria aldizkarian ere egiten dituzte kolaborazio lanak eta irratsaioarekin ahozkotasuna, inprobisazioa, bat-batekotasuna lantzen dituzten bezala, kasu honetan idazteko gaitasunak fintzen dituzte eta ikasleei laguntzen die ulertzen euskara ez dela zerbait anekdotikoa, zerbait fosila; euskara bizi dela, euskara bizia dela eta bizi daitekeela euskaraz.

The post Larrungo uhinak appeared first on ARGIAren barrenak.

Artikulu hau egilearen RSS jariotik automatikoki ekarri da hona. Baliteke jatorrizko artikulua luzeagoa izatea, eta hemen irakur dezakezu.
Kazetaritza independentea egiten dugu. Txikitik eragiten.