[Itsaso Zubiria Etxeberria] Gutxi izango dira kontra egingo dizutenak planteatzen diezunean edukia besteen eskura, libre uztearen teoria. Teorian geratzen den bitartean, behintzat. Utopian. Baina zer gertatzen da praktikan jartzen hasten garenean? Hor hasten dira agertzen aurreneko “baina hau nik egin dut eta nirea da, zergatik eman besteei erabiltzeko eskubidea?”, bezalako esaldiak. Teoria eta praktika hauek euskal komunikabideetako lizentzietara ekarri eta gaiaz ARGIAren ikuspegitik hitz egin zuten urriaren 24an Iametzak antolatutako Euskarabildua jardunaldietan Axier Lopez eta Xabier Letonak, Elkarrekin eta libre bagoaz. ARGIA eta CC lizentziak hitzaldian.

Sarrera moduan aipatu zituzten software librearen hastapenak eta honi lotu zioten lizentzia eta kultura librearen haria. Nola bizi du ARGIA bezalako euskal hedabide batek bere eduki guztiak CC by-sa lizentziapean denen eskura jartzea? Eta hizkuntza txiki eta gutxitu batean funtzionatu eta komunikatzen diren beste hedabideek nola bizi dute hau? Zertan da lizentzien kontuan euskal hedabideen komunitatea? Bi jarrera nagusi bereizi zituzten: batzuen ustez, edukiak libre partekatu behar dira, edukiak osorik, ahalik eta gehien hobeto, horrek indartu egiten gaituelako, bai euskal hedabideok oro har, baita hedabide bakoitza ere. Besteen ustez, medio handiago batek txikiaren edukia hartzen badu, txikiaren zabalkundea mugatzen du, besteak beste, sareko posizionamendu kontuengatik edo handiak itzal handiagoa duelako; horregatik, eskatzen da edukiaren hasiera hartzea, baina gero irakurtzen jarraitu nahi izatekotan edukia landu duen hedabidera bideratzea.
Baina ez al dugu ba elkartuta indarra hartzen? Hala ulertzen du, behintzat, ARGIAk. Komunitatean sinesten du, eta entenditzen du komunitateko informazio eta edukiak geroz eta mugimendu handiagoa izan, talde hori bera sendotzen duela, agenda informatibo bat markatzen laguntzen duela, nazio eraikuntzarako beste giltza bat gehiago dela. Eta azpimarratu zutenez, duela hiru urte martxan jarri zen ARGIAren harpidetza eredua ez dago ulertzerik lizentzia eta kultura librea konprenitu gabe. Gai potoloa, euskal hedabideen komunitatean akaso eztabaida sakonagoa izan beharko lukeena, eta erpin asko dituena.