2018-10-31 17:31

Nork ez du ezagutzen Ordiziako Azoka? Gure aitona zena zalea zen oso, eta badut nire buruan bere lekutxoa betetzen duen oroitzapenik. Udako asteazken goizean bi bilobak hartuta dedo-n joaten zen gustura asko Antonio Zaldibiatik Ordiziara, aspaldiko lagun baserritar harekin egon, beste artzainari kasu egin… Ondo gogoratzen ditut oraino garaiko barazkien usainak, gaztaren aromak… Usaimena omen oroitzapenen iturri emankorrenetako bat.

Azokagatik da etxe askotan ezagun Goierriko herria, eta figura hori aprobetxatu nahi dute ordiziarrek, azaroaren 17an beste gizarte eredu bat eraikitzeko. Kolore-Truk merkatu soziala. Udaleko Migrazio Sailetik piztutako egun honen bueltan ari dira herriko hainbat eta hainbat elkarte eta eragile sozial biltzen. Lehendik antolatu izan dira kulturen arteko topaketak, eta aurtengoan Azokarekin buelta bat gehiago eman nahi zaio, Ordiziakoa ezaguna bada ere mundu mailako eredua baita, herriko ekonomia eta kultura islatu eta mugitzen dituena.

Herriko eragileek beren postuak jarriko dituzte eta gizarte eredu alternatiboak azaleratzeko aukera izatea da helburua. Olatukoop sarearekin jarri dira harremanetan, eta Ordizian edo inguruetan beren egoitza duten elkarteekin ere hitz egin dute bertan izan daitezen: Goiener, Fiare, Izarkom edo Farapi, kasu. Truke-gune bat ere egongo da, Hiri-Hezitzaile programa kontutan hartuz haur-jolasak izango dira zaharrenek gazteenentzat prestatuta herritarrak herritarren artean hazi eta hezteko filosofia bere eginez… Baina aldatzen ari den jendarte honetan sarri ekuazioan sartzea kostatzen zaigun migrazioaren faktorea ez dute alde batera utzi nahi, euskarak integraziorako tresna moduan duen balioaz hitz egingo dute, migrazio-mugimenduez eta honen inguruko Europaren jarrerez, baita nekazaritzaz edo feminismoaz ere, dena kate batean irudikatzen baitute; gizarte eredu baten katebegiak.

ARGIA bertan izango da

Aste osoko jardunaldiak daude antolatuta, eta ARGIA da hitzaldi bat ematera gonbidatuetako bat. Nola urruntzen du euskaratik beste lurralde batetik etorritakoa bere egoera sozio-ekonomikoak? Ze erronka ditu euskal gizarteak hizkuntza eta migrazioarekin? Eta euskal komunikabideek zertan eragiten dute? Nola egituratzen ditu erronka hauek ARGIA bezalako proiektu komunikatibo independente batek?

Gizarte ereduaren aldaketa. Hainbestetan entzun edo esaten dugun esaldi mardul hori hartu eta horretan eragitea zail denez, esaldi potoloa aletu, eta ale txiki bakoitzetik eragiten hasi nahi du Ordiziak.

Artikulu hau egilearen RSS jariotik automatikoki ekarri da hona. Baliteke jatorrizko artikulua luzeagoa izatea, eta hemen irakur dezakezu.
Kazetaritza independentea egiten dugu. Txikitik eragiten.