Ar Redadeg bretoieraren aldeko Korrika da. Maiatzaren 4an hasiko da Kemperretik, eta 1800 kilometro egindakoan, hilaren 12an bukatuko da Plougernen. Hamargarren urtemuga ospatzeko, REDADEG ekimenak mahai-ingurua antolatu du, Europan egiten diren “KORRIKA” modukoak parte hartzera gonbidatuz.
AEK-Korrikaren izenean, Mertxe Mugika (AEKren koordinatzaile nagusia), Asier Amondo (KORRIKA arduraduna) eta Jakes Bortayru (Iparraldeko koordinatzailea eta Korrika batzordeko kidea) izango dira bertan. Gainontzeko partaideak hauek izango dira: Correlingua: Galizia, Correlengua: Catalunya, Course Lingua: Val d'Aran, Le Passem: Bearn, Ar Redadeg: Bretainia, Ras Yr Laith: Gales, An Rith: Irlanda.
Esperientziak partekatzeaz gain, Hizkuntzen aldeko lasterketen Europar sarea (EUROKORRIKA) osatuko dugu, elkarrekin nazioartean urrats berriak emateko; larunbatean, besteak beste, adierazpen bat hedatuko dugu.
Errepideko berriei dagokienez, AEK-ko kideok ere bertan izango gara! Izan ere, edizio bakoitzean egin ohi duten bezala, Ipar Euskal Herriko AEK-k kilometroa hartu du; bigarren larunbatean, hain zuzen: maiatzaren 12an. Bestalde, Oiartzundik plana antolatu da bertaratzeko, Oiartzunek azken 20 urteetan-edo senidetza izan baitu Bretainiako Karaez herriarekin.
AR REDADEG-en hasiera bera nahiz naizoarteko musika jaialdia zuzenean ikusteko: https://www.facebook.com/ar.redadeg/ edo https://www.facebook.com/france3breizh edo www.antourtan.bzh