Lagunarteko afari batean Interneteko eduki sortzaileez geniharduela, batek bota zuen edonori deritzogula sortzaile, bai unpoltsina egiten duenari, bai bere burua asaskatzen duenari, bai arte dibulgatzaileari. Era berean, iragarpen apokaliptikoen aurretik, Adimen Artifizialari Adimen Sortzailea deitzen zaiola ikusi dugu, generative adieran. Sortzailea? Ala sarean topatzen duen guztia ostu eta bere egiten duen arpilatzailea? Bitartean, kultura sortzaile euskaldunak gorriak ikusten dabiltza bizimodua aurrera ateratzeko. 

Sortu da gakoa, ez alderdia –lagako diozue erakunde eta partiduei aditzekin bataiatzeari?–. Hitz horrek, euskaraz, esanahi asko dituelako: jaio, eragin, kreatu… Denak desberdinak; beraz, berriak sortu behar. Zeren, bestela, Sortukoak ere sortzaileak ote? Ez dakit, bada, Rick.

Agian, influencer horiei sortzaile baino edukiz betetzaile esan geniezaieke, sare sozialak bete egiten dituztelako, lastoz sarri askotan.

Eta Adimen Artifizialari, lapur plagiatzaile? Apailatzailea, muntatzailea, dotoreago egite aldera?

Baina artistendako lagako nuke sortzailetasuna. Kreatzaile ere izendatuko nituzke, euren adimen naturalak edertasuna eta artea egiten dituelako.

Sortuko ditugu, ezta?