Baigorrira itzuliz, Donibane
Garazirako bidean Irulegitik pasatuko gara. Herri hau, jatorrizko
izendapena duen bertako ardoarengatik da ezaguna, izan ere Ipar
Euskal Herrian dagoen izendapen bakarra baita. Aipatzekoak dira,
halaber, Sorhoetako Kaperan dauden XVII.-XVIII. mende inguruko egurrezko
estatuak.
6 km. geroago (Uharte-Garazi
igaro ostean) euskal hiribururik txikienean baina baita herririk
politenetako batean ere sartuko gara. Alderdi guztietatik erdi aroko
kutsua darion leku ederra eta oso animatua da Donibane Garazi. Ondare
historiko-artistiko zabal horrek eta, halaber, baserritarrek, erromesek,
merkatariek eta turistek sortzen duten giroak, guztiz erakargarria
egiten dute inguru hau.
Gure ibilbidea 4 km. aurrerago
amaituko dugu, Izpura igaro ondoren, Donazaharren (St.-Jean-le-Vieux)
hain zuzen ere. Donazaharre Santiagora zihoazen erromesen atsedenleku
izan genuen, eta hiriburua baino are garrantzitsuagoa. Bertako elizak,
adibidez, prioretxe-ospitale funtzioak bete izan ditu, Garazi Herriko
ordezkarien batzarleku izateaz gain. Etxe bikainek eta frontoira
begira dagoen plaza batek edertasun handiz janzten dute kale nagusia.
Plazak harrizko gurutze interesgarri bat du.
|
DONIBANE
GARAZI
Donibane Garazi Euskal Herriko hiribururik txikiena da (Nafarroa
Beherean), baina aldi berean herririk politenetako bat ere bai,
Ipar Euskal Herrian gune turistiko oso garrantzitsua izateaz gainera.
HISTORIA PIXKA BAT
Antzina Akitaniako Dukerriaren mende egon zela diote, baina handik
gutxira Nafarroako Erresumaren zati izatera pasatu zen. 1383 eta
1417 urte bitartean, mendebaldean izandako zisma-garaian, Avignongo
Apezpikuaren egoitza bertan kokatua izan genuen, Aita Santuak Baionakoa
bakarrik onartzen zuen bitartean.
XVIan espainiarrek eta nafarrek hiria txandaka hartu
zuten beren mende. Bake-garaian harresietatik kanpo garatu eta Ziutadela
eraiki zuten, aurreko gazteluaren ordez. Dena den, erdi aroko itxura
duen hiria izaten jarraitzen du oraindik.
IKUSTEKOAK
Donibaneko ohiko kaleak maldan gora antolatuta daude, muino baten
gainean dagoen Ziutadelara begira. De Gaulle edo Marché Plazan
Turismo Bulegoaz gain Herriko Etxea dugu, Mansart Jauregian. Louis
XIV. estiloko etxe gorrixka ederra dugu berau.
Errobi ibairantz hurbilduz, zubian geldituko gara unetxo batez,
hiri honetako postalik ezagunenaz gozatzeko, gure aurrean
zintzilik dauden egurrezko balkoi luzeko etxe zaharrak, zubi zaharra,
eliza eta Ziutadelako mendixka ditugula. Bertan dagoen Nafarroako
Atea igaroz gero, harresien barnean sartuko gara; nahi badugu harresien
gainetik ere ibil gaitezke, igotzeko eskailerak daudelako.
Aurre-aurrean, Notre Dame du Bout du Pont Eliza dugu, baina horren
aurretik Xabierko San Frantziskoren arbasoen jauregia ere hortxe
dugu, besteak beste. Elizaren lehen aulkiak antzinako elizaren garaikoak
dira, Navas de Tolosako garaipena ospatzeko Antso Azkarrak eraikia.
Barneluzego bakarrekoa, beirategietan eta aldarean Nafarroako kateak
aurkituko ditugu.
Notre Dameko Atea zeharkatuz, erromesen bidetik, Ziutadelako karrikatik
gora igotzen hasiko gara. Aldapa gogorreko kale harritsu hau Euskal
Herrian aurkitu ditugun politenetako bat da, bere etxe, teilatu
eta ateburu koloretsu eta apainduekin.
32. zenbakian Donibaneko etxerik zaharrena eta politenetakoa dugu,
1510ekoa, 39an Apezpikuen Etxea eta 41ean XIII.eko Apezpikuen Presondegia
izandakoa. Bertatik barruko gelak ikus daitezke, eta beheko solairuan
presoak lotuta edukitzeko iduneko eta zirgilo beldurgarriak. Zabalik:
apiriletik azaroaren 15a bitarte, 9:30-19 ordutegia duela.
Etxe interesgarri askotxoren artetik gora segituz Saint-Jacques
Atea topatuko dugu, erromesak sartzen zireneko atea. Hemendik aurrera,
igoera txiki bat besterik ez zaigu geratzen XVII.eko Ziutadelaraino.
Aldapa honek Erregearen Ateraino eramango gaitu. Gero, zubi altxagarriaren
ostean, Gobernatzaileen Pabilioia dago, kanpandorre polit bat duela.
Barrualdera ezin gaitezke sartu, bertan lizeo bat dagoelako, baina
begiratokia konparaezina da.
Kale harritsu beretik beherantz goazela, erdialde parean eskuinetara
karrika bat ikusiko dugu, Frantziako Atera eta plaza nagusira eramango
gaituena. Ateak harresietara igotzeko beste eskailera bat ere badu.
Guk Ziutadelako Karrikatik beherantz segituko dugu, ibaia zeharkatu
eta Espainiako Kalera iritsi arte. Azken hori, merkataritza-kale
oso animatua da, oroigarriren bat erosteko aproposa, etxe atseginen
artean artisautza mota askotako dendak tartekatzen direlarik.
Errobi ibaiaren ur garbietara itzuliz, harekiko paralelo doan bide
bat ikusiko dugu. Bide honetatik eskailera luze batek berriz ere
Ziutadelaraino eraman gaitzake, edo bestela, egurrezko zubitxo polit
bat zeharkatuz, udal kanpinera eta pilotalekura. Harantzago, zubi
erromatarra dugu, erdi arokoa, noski, ingurune arbolatsu eta
oso polit batean.
Herrialdea:
Altitudea:
Biztanleak:
Euskaldunak:
Azalera:
Dentsitatea:
Jaiak: |
Nafarroa
Beherea
163 m.
1.726
daturik ez
3 km2
575 bizt./km2
Herriko Jaiak (abuztuak 14-16)
Maskaradak (Ihauteriak) |
|