ARGIA.eus

2022ko irailaren 29a
Editoriala

Informazio burujabetzatik utopiara

Ilustrazioa: Paula Estévez.
ARGIA @argia
2021eko abuztuaren 05a

Garai distopikoak bizi ditugu, zertan uka. 2019an ere bizi ginen distopian, horretara ohituta bageunden ere –eta gure munduko txoko honetan distopia bizigarriagoa bazaigu ere, munduaren luze-zabala gero eta biziezinago egitearen truk–. Baina 2020tik jauzi kualitatiboa egin dugu. Akaso beldurgarriena ez da hori, akaso arriskutsuena da kosta egiten zaigula irudikatzea distopia sakontzea ez den bestelako etorkizunik. Baita behetik, ezkerretik, txikitik eragiten saiatzen garenoi ere.

Etsi dezakegu, sakondu beldurrean, otzantasunean, kontserbadurismoan, behekoon arteko borrokan, biziraupen indibidualean: onargarriaren langa jaisten jarraitu, atzo onartezin zitzaizkigun apurrak pribilegio izendatzeko bihar. Edo, egun hain estuak diruditen litekeenaren mugak baimenik gabe zeharkatzeko ametsari eutsi diezaiokegu, temati.

"Ez badiogu ametsari eusten, akabo. Baina ametsak ezin dira ameskeri izan, sinesmena ezin dugu sineskerietan sustengatu"

Egiazki garenak baino hobeak garela sinetsi beharko dugu horretarako. Garena baino enpatikoagoak, solidarioagoak, iraultzaileagoak, etikoagoak, espezie eta pertsona hobeak. Ez autokonplazentzia eta zuritze ariketa lasaigarri bat egiteko; eraldaketa gure eskutan dagoela eta bide hori egiteko ahalaren sua bizirik dugula ez ahazteko baizik. Distopiatik utopiarako bidea egiteko gure gaitasunetan sinetsi, sentitu, gaitasun teorikoa indar erreal bilakatzeko. “Guraso zuriek esaten digute: pentsatzen dut, beraz banaiz. Baina barruan daramagun ama beltzak –poetak– ametsetan xuxurlatzen digu: sentitzen dut, beraz aske izan naiteke”, idatzi zuen Audre Lordek. Ez badiogu ametsari eusten, akabo. Baina ametsak ezin dira ameskeri izan, sinesmena ezin dugu sineskerietan sustengatu.

Helduleku materialak behar ditugu, proiektu, jarrera, prozesu eraldatzaile ukigarriak. Beldur, injustizia eta ziurgabetasun betean, ezkerretik elkar-laguntzarako alternatiba kolektiboak ez badira eraikitzen, eskuinera egiten jarraituko dugu denok elkar-leihan. Sustraietatiko eraldaketa integrala ortzi mugan izango dutenak, baina eguneroko behar material eta emozionalak aseko dituztenak ere bai: elikagaia, energia, kolektibo baten parte izatearen sentimendua, etxebizitza, osasuna, komunikazioa, kidetasuna...

Burujabetza proiektu bakoitzaren oinarrian bada jende multzo handiago edo txikiago bat elkarri begietara begiratu diona, elkarrekin hausnartu, amestu eta izerditzen duena, denbora eta gogoa eskaini diona mundu anker hau bizigarriago egiteari. Proiektuak gabeziez eta kontraesanez beteta daudela? Irla txikiegien artxipelago ezgauza garela ozeano patriarkal kapitalistaren erdian? Noski, egun garenetik sortu baititugu. Gakoa da bihar izan nahi duguna izateko erreminta baliagarriak ote zaizkigun. Uste horretatik ardaztu dugu aurtengo Aktualitatearen GAKOAK, burujabetzen inguruan.

"Burujabetzak bidearen harlauzak dira: urratsak airean ez emateko oinarri materiala"

Burujabetzen norabide orokorrari gure esparrutik, informazio burujabetzatik, egin nahi izan diogu ekarpena ale honekin. Eta ARGIArekin oro har. Modu independentean informatzeko ere burujabe izatea ezinbestekoa baita, eta hori lantzen dugun informaziotik eta lantzeko ikuspegitik askoz harago doa: diru-iturriak, astekariaren inprimaketa zein banaketa, ARGIA komunitatearen sostengua, bitarteko teknologikoak, barne antolaketa... Prozesuaren eta proiektuaren ertz guztiei heldu nahi diegu burujabetzatik eta eraldaketatik, hor goaz tirri-tarra urratsak ematen, azkenaldian astekariaren bizikleta bidezko banaketarekin bereziki.

Eduardo Galeanok idatzi zuen utopiak, pauso bat ematen dugun aldiro urrats bat urruntzen den horrek, horretarako balio duela, ibiltzeko. Burujabetzak bidearen harlauzak dira orduan: urratsak airean ez emateko oinarri materiala. Egungo distopiatik biharko utopiara bidaiatzeko orainaldirako erreminta. Distopiatik utopiara dagoen distantzia.

 

*Artikulu hau ARGIAren Aktualitatearen Gakoak aldizkarian argitaratu da. ARGIA Jendeak etxean jasoko du Gakoak. Gainerakoek, Azokan eros dezakezue.

Kanal hauetan artxibatua: Aktualitatearen Gakoak 2021  |  Burujabetza

Aktualitatearen Gakoak 2021 kanaletik interesatuko zaizu...
2021-08-13 | June Fernández
Zaintza sistema
Kaka ongarri bihurtu

Pandemiak agerian utzi ditu, bere gordintasun osoan, zaharren, haurren eta dependentzia egoeran dauden herritarren arreta-eredu neoliberalaren ondorioak. Konfinamendu garaian loratutako diskurtso kritiko eta alternatiba komunitarioak sendotzeko unea da orain.


Burujabetzarako bidea elikatzen

Euskal Herrian elikadura eta ekoizpena begirada eraldatzaile batetik lantzen ari diren proiektu ugari ditugu, eta sare anitz bezain sendoa osatzen dute. Aberastasun horren isla diren hiru proiekturengana jo dugu, ustezko utopia hori praktikara eramateko bilatu dituzten bideak... [+]


Osasuna autokudeatzeaz
COVID-19: Non dira osasunaren prebentzioa, burujabetza eta iraunkortasuna?

Guztiontzat bizitza bizigarriak lortzeko kartografia berriak behar ditugu. Bizitzaren iraunkortasunerako oinarriak kolokan daude, eta, aldaketa garaia baino, garai aldaketa da gure gorputzetan sentitzen ari garena. Sentipen honetan, galdera ez da kolapsora goazen ala ez... [+]


Energia komunitateak Nafarroan
Bost herri txiki energia trantsizioan tiraka

Bi fenomeno handi ari dira ematen, besteak beste, bizi dugun energia trantsizioaren bueltan: batetik, energia berriztagarrien bigarren leherketa –ARGIAren 2.731 zenbakian landu genuen– eta, bestetik, energia komunitateen sorrera eta garapena. Bietan ere enpresa... [+]


2021-08-10 | Estitxu Eizagirre
Energia komunitateak
Eraldaketa erreala... edo diru publikoz egindako negozioa

Orain guztiok nahi dugu herrian energia komunitate bat. Europak zabaldu du zirrikitua; diru publikoa enpresa pribatuetara azkar bideratzeko formula berritzaileak sustatu dituzte Next diru-laguntzek; eta praktika kutsakorrak dituzten ingeniaritza eta energia enpresa handiek... [+]



Irakurrienak
Argia buletina
Egunaren laburpena
zure e-postan
Eguneraketa berriak daude