Izua Errekalden
“¿Vosotros qué cojones hacéis aquí? ¡A la puta mierda! ¡Aquí no pintáis nada!”. Gutxi gorabehera hitz horiekin gonbidatu gaitu ertzain batek alde egitera, auto biren artean makurtuta geure burua gomazko pilotez babesten saiatzen ari ginen taldetxo bati; tartean, kazetari bi. Orain dela bost ordu inguru gertatu da hori, Bilboko Errekalde auzoan, Kukutza gaztetxetik hurbil. Denbora tarte hori igarotzen utzi dut hau idazten hasi aurretik, ulertzekoa den momentuko amorruak ez ziezadan eragotzi gaurko gertakarien kronika zintzoa, demagogiak eta aurreiritziek kutsatu gabea, egiari atxikia… idaztea. Ez dakit lortuko dudan.
Kukutza gaztetxea aspaldi abandonatutako fabrika batean loratu da azken hamahiru urteotan. Kendu burutik hard-rock kontzertuak antolatzen eta porroak erretzen baizik ez dakien gaztetxo batzuen irudia. (Hard-rock kontzertuak antolatzea eta porroak erretzea guztiz zilegi da, badaezpada gehitu dezadan). Kukutzak Errekaldeko gazte, ez hain gazte eta umeei eskaini die beste iturri batzuetatik jaso ez dutena: aisialdirako alternatibak, ekintza kulturalak, ikastaroak, entsegu-aretoak…
Cabisa enpresak 1994an ordaindu zuen Kukutza dagoen fabrika zaharraren jabetza eskuratzeko. Urte bi geroago, Udalak birkalifikatu egin zuen orubea, eta eraikigarri izendatu. Aurtengo maiatzean, Cabisak eraikina eraisteko baimena eskatu zuen; iraila hasieran eman zioten. Helburua merkatu librean salduko diren etxebizitzak eraikitzea da, 2.000 etxebizitza huts (auzoko guztien %9) daukan Errekalden.
Horiexek aurrekariak. Gaurkoa gertatzeko azken baldintza zen epaile batek eraikina husteko agindua ematea. Eta agindu hori izango da Ertzaintzak gaur Errekalden egindakoa justifikatzeko Rodolfo Aresek –hau idazten ari naizen une bererako iragarrita daude haren adierazpenak– edukiko duen argudioa. Dozenaka zauritu eragin eta gero –Herrizaingo Sailak bakarra izan dela esan arren– beste epaile batek (momentuz) indargabetu duen agindua, Errekaldeberriz auzokide elkarteak aurkeztutako helegiteari men eginez. Garaipen txiki bat, agintarien arreta eskasaz mila bider kexatu den auzo batentzat. Ostiralean jakingo da eraiste aginduak aurrera segitzen duen edo behin-betiko bertan behera uzten duten.
![Ehunka lagun gaztetxearen desalojoagatik protestan. Handik minutu gutxira pilotakadak botaz sakabanatu ditu Ertzaintzak. (Arg.: Unai Brea)](https://blogak.argia.eus/unai-brea/wp-content/uploads/sites/62/2011/09/P1010016-300x225.jpg)
Ehunka lagun gaztetxearen desalojoagatik protestan. Handik minutu gutxira pilotakadak botaz sakabanatu ditu Ertzaintzak. (Arg.: Unai Brea)
Eskubide batzuk beste batzuen gainetik daudela esan ohi da. Nik ez dakit noraino diren garrantzitsuak Cabisa enpresaren eskubideak, baina ez dira nolanahikoak izango, gaur Ertzaintzak Errekalden egin duen oinarrizko zenbait giza-eskubideren zanpaketa justifikatzen badute. Poliziaren interbentzio batean pilotakadak eta porra kolpeak izaten dira larriena, batez ere jasotzen dituztenentzat, baina ni benetan ikaratu nauena izan da nola eragotzi duten oinezkoen zirkulazio askea eta zer nolako bortxaz uxatu dituzten beraiekin era baketsuan hitz egiteko asmoz hurbildu zaizkien guztiak –Bildu, Ezker Batua eta Aralarreko ordezkariak izan ezik–, segurtasunaren ikuspuntutik horretarako arrazoi argirik egon gabe. Ea nola azaltzen duen hori Rodolfo Aresek. Izan ere, beharbada gehien ikaratzen nauena da Aresek gaurko kargu bera izaten jarraituko duela bihar, eta gutxi asaldatuko direla horregatik.
Hemen zeozer ez dago ondo.
Zu guzurretan ari zara ala Ares?
Eta Ares,erantzunkizun politikoagatik, ezin da izan, beraz…
http://www.youtube.com/watch?v=yvTO87qkjow