Egoera aldaketa blogean
DBHko edo batxilergoko ikasle bati “Egoera aldaketa” aipatu ezkero, solido-likido, likido-solido, likido-gas edo antzeko zerbait etorriko zaio burura. Jakina den bezala, inguru baldintzen arabera materia egoera ezberdinetan aurki daiteke.
Konparaketa bat eginez, nire blogari ere antzeko zerbait gertatu zaiola esan daiteke. Bloga martxan jarri eta lehen hilabeteak nahiko dinamikoak izan ziren; astero astero sarrera bat zintzilikatu nuen, eta orokorrean bloga nahiko mugitu zela esango nuke. Beraz, bere “molekulek” energia dexente izan zuten. Urtarriletik aurrera ordea, bloga zegoen gelako temperatura bapatean jaitsi egin zen, eta honek bere molekulak liratekeen sarrerak gutxiago mugitu ahal izatea eragin du. Ez dago argi zein izan den blogaren egoera aldaketa, baina likidotik solidora edo gas egoeratik egoera likidora pasatu dela esan behar.
Astero astero sarrera berri bat zintzilikatzeko (molekulak asko mugitzen jarraitzeko) nonbaitetik energia jaso behar izan zuen blogak. Dudarik gabe, hurrengo sarrerarako gaian pentsatzeko nahikoa denbora izatea energia iturri garrantzitsua izan zen. Baina jendeak bloga irakurtzen zuela jakiteak ere energía ekarpen haundia suposatu zion blogari. Zer esanik ez aldiren batean irakurleen iradokizunak jasotzeak. Horiek guztiak ezinbestekoak izan ziren blogaren molekulak beren errotazio, bibrazio eta traslazio egoera mantendu, eta bloga bere hasierako egoeran (likido edo gas egoeran) mantentzeko. Badakit kasu batzuetan sarrerak agian ez zirela jendearen arreta erakartzeko bezain onak izango, baina asteroko maiztasunari fin eutsi niola esan behar.
Energia iturri horietako bat ordea eten egin zitzaidan. Funtsean, orain blogeko hurrengo sarrerarako gaian pentsatzeko eta informazioa bilatzeko denborarik gabe nabil, eta ondorioz blogaren molekulek (sarrerek) ezin izan dute lehenago zeukaten mugimendu maila mantendu. Badakit sarrera berriak zintzilikatu ezkero, zenbaitek irakurriko lituzketela, eta horrek dinamismo apur bat mantentzen lagunduko dit, baina bloga dagoen egoera berrian (solido nahiz likido egoeran), ezinezkoa izango da lehen hilabeteetako maiztasunari eutsi eta astero astero sarrera berri bat zintzilikatzea. Edonola ere, solido egoeran daudenean ere molekulak ez dira geldirik egoten, eta blog honek ere, maiztasun jakinik gabe izanik ere, zeozer eskeintzen jarraituko du.
Eta tira, metáfora eta alderaketak albo batera utzita, aipa dezadan orain denbora falta horren arrazoia. Blogaren lehenengo sarreretako batean kontatu nizuen bezala, Tarragonako ICIQn ikerketaldi bat hastekoa nintzen. Irailetik hasita horretarako finantziazio bila ibili naiz, eta azkenean bi urtez ikertzen jarraitzeko diru iturria lortu dut. Noski, nahiago nuke Euskal Herrian bertan, ikerkuntzan edo beste edozertan lan egiteko aukera izatea, baina azkenean Tarragonara etortzeko aukera sortu zait eta ezin albora utzi. Ez da hona etortzen naizen lehen aldia. Izan ere, nire doktoretza ikasketen laugarren urtean hiru hilabeteko egonaldia egin nuen ikerketa zentro honetan, eta esperientzia ona izan zenez gero, oso gustora etorri naiz.
Ba horixe besterik ez gaurkoz. Ea berandu baino lehen beste kontu batzuekin etortzen naizen.
2 Iruzkin
Trackbacks/Pingbacks
- Itzulera | Zientziaren labirintoan kokatuz - [...] edo horretan ahaleginduko naiz behintzat. Era berean, barkamena eskatu behar dizuet sarrera honetan egoera aldaketaren sarrerako konparaketara itzultzeagatik. Beste…
- Itzuli naiz!! | Zientziaren labirintoan kokatuz - […] Egoera aldaketa blogean […]
Oier, konparaketa ederra! Zure hurrengo post-ak irakurtzeko irrikitan. Ondo ibili Tarragonan!
Aupa Oier, gustu handiz irakurri ditugu oraingoak eta hurrengoen zain geratzen gara!