Moro putak

Kezkatuta bizi ditut aspaldian gazteen artean eskolan entzuten ari naizen komentarioak. Zarauzko aterpetxera, itxuraz, inork inguruan nahi ez dituen zenbait gazte etorkin ekarri dituzte, marokoarrak itxura batean gehienak. Eta bolo-bolo dabiltza gazte hauen inguruko esamesak: mugikorrak lapurtzen harrapatu dituztela, neskak bortxatzen saiatu direla, mutur joka entretenitzen dituztela arratsaldeak, kola arnasten dutela…

Beldurgarria da gazteek moroez nolako amorruz eta ezinikusiz hitz egiten duten entzutea. Beldurgarria komentario horiek gazteenak soilik ez direla jakitea: “lehen Zarautzen bizikleta lotu gabe lasai uzten genuen eta orain ezinezkoa da hori”, “pentsaezina da Zarautzen orain indarkeria arriskurik gabe gure seme-alabak lasai kalean uztea” eta horrelakoak. Eta izango da egiatik asko. Eta puztutako egiatik ere bai akaso. Aterpetxera ekarri dituzten gazte denak ez direlako horrelakoak izango, aterpetxera ekarritako guztiak horrelakoak izanda ere horrek ez duelako marrokiar guztiak horrelakoak direnik justifikatzen. Areago, moro puta horiek ez dira herrian gertatzen ari diren gaitz guztien erantzule. Lehen ere bagenituen herrian lapurrak, bortxatzaileak eta drogazaleak. Orain ere bai, baina diferentzia batekin: orain badugu urkamendira nor eramana. Eta kondenak behin betikoa dirudi krisi hotsak entzuten (oraindik ez sobera igertzen) hasi garen garaiotan…