Zer da gehiago, zazpi ala hiru?

Gorka Bereziartua
13

Kazetariren bat ezagutzen duenak badaki gremiokooi zenbaki kontuak ez zaizkigula oso ondo ematen. Hala ere, titularreko galdera erantzuteko gai gara, hamar kazetaritik bederatzi (datu ez-ofiziala da). Beti dago ordea estatistika pikutaratzen duen baten bat: albiste bi atzo, Gipuzkoako bi egunkaritan, Usurbilgo atez-ateko zabor bilketa sistemari buruz. Datu berak, baina interpretazio xahu diferenteak: El Diario Vascoren arabera, usurbildarren %70,9k esan du inoiz ez duela zaborra beste herri batera eraman; Noticias de Gipuzkoak, aldiz, honakoarekin harritu gintuen: “Hamar bizilagunetatik hiruk zaborra beste herrietan botatzen dutela konfesatu dute”.
Adi bi gauzari:

1) Gutxiengo absolutu baten (herritarren %29,1) joera nabarmendu du Noticiasek. Albistea, ordea, bestea da: herri oso batek zaborra kudeatzeko sistema aldatu, eta denbora gutxian bizilagun gehienak horretara ondo egokitu direla, alegia. Zazpi gehiago da hiru baino; 70, 9 gehiago, 29,1 baino.

2) Zaborra beste nonbait botatzen duten horiek inkesta beste guztiek bezala erantzungo zutela imajinatzen dut. Erantzun… Baina notiziak dio “konfesatu” egin dutela. Aditza intentzioz armatuta dator, tiro egiteko prest. Ez baita iguala erantzutea eta konfesatzea: aurrenekoa telefonoaren beste aldetik egiten da, egongelako lasaitasunean; bigarrena, aldiz, elizan edo are toki ilunagoetan, sotanen edo uniformeen presioak larrituta. Hara hor aditz bat edo bestea aukeratzeak martxan jartzen duen artefaktu ideologikoa. Eta iruditzen zait, etika periodistikoak (oximorona?) aurreneko aditza eskatzen duela notizia honetan.

Eta horrela joan da, andre-jaunok, beste kapitulu bat atez ateko bilketaren kontrako kanpainan. Biharko saioan, errauskailuaren abantailak erakutsiko dizkigu… A, ez?
PS: Atez ateko zabor bilketari buruzko informazio gehiago nahi izanez gero, Twitterreko kanal hau interesatuko zaizu; handik atera ditut post- hau idazteko erabilitako bi albisteak.
Eguneraketa (2009-XII-16, 18:25):
Erantzunetako batean Aztiker-ek egindako ikerketaren zenbait alor auzitan jarri zuenez, egoki ikusi nuen inkestari buruzko datu gehiago eskatzea. Hona Aztikerretik Usurbilen egindako galdeketaz eman dizkidaten zenbait datu:

• Inkestaren unibertsoa Usurbilen bizi diren 15 urtetik gorako biztanleak izan dira (Zubietako auzoetan bizi direnak salbu), errolda datuen arabera 4.857 lagun.

• Lagina, hots, elkarrizketatuak 450 izan dira.

• Beraz, inkestaren akats tartea ±%4,5ekoa da lagin osoarentzat, %95,5eko konfidantza mailan, eta p=q=%50 hipotesirako (alegia, hipotesirik kontrakoenarentzat, iritzietan heterogenotasun handia dagoela suposatzen duena).

• Horrez gain, sexu eta adin kuotak erabili ditugu, eta auzokako adierazgarritasuna ere bilatu dugu. Jasotako emaitzak usurbildarren iritzien ahalik eta argazki fidelena izan zitezen.

13 Iruzkin
Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

ARGIAko Blogarien Komunitatea - CC-BY-SA