Gerra krimena izan zen Israelek Askatasunaren Ontzidiari egindako erasoa, Nazioarteko Zigor Auzitegiaren arabera

Hala ebatzi berri du Nazioarteko Zigor Auzitegiak (NZA) azaroaren 6an argitaratu duen dokumentuaren bitartez. Erasoa gerra krimentzat jotzeko “ontzietako aktibista guztiek zibilen estatua zutelako eta nazioarteko legediaren babesa zutelako” argudiatu du NZAk. Halere, auzitegiak ez du ikerketa formalik abiatuko, haien esanetan, NZAk epaitzeko moduko larritasuna ez duten gertaerak direlako. Dagokien estaturen esku utzi du Israelen aurkako prozesu judiziala egiteko aukera.

Gazara 10.000 tona laguntza humanitarioa zeramaten sei ontziri Israelgo itsas armadak egindako erasoa izan zen 2010eko maiatzaren 31n. 32 herrialdetako 750 ekintzaile inguru zihoazen itsasontzi horietan. Erasoa nazioarteko uretan egin zuten, kostaldetik 40 miliara, eta hamaika zauritu eta 19 lagun hil zituen Israelgo armadak. Mavi Marmara ontzian gertatutakoa gaitzetsi du NZAak. 2012an Espainiako Auzitegi Nazionalak erasoa gizateriaren aurkako krimena zela ebatzi zuen eta Gobernuari helarazi zion kasua, NZAri bidali ala ez erabaki zezan. NZAren ebazpenaren ostean ikusteko dago ea estatuek auziari helduko dioten ala orain arteko isiltasun konplizearekin erantzungo ote duten.
Nazioarteko Auzitegiaren fiskal nagusi Fatou Bensoudak ebazpenaren oinarriak azaldu ditu bideo honetan:

Nazioarteko instituzioen aho txikia
Aurtengo Gazaren kontrako erasoaren irudiak oraindik gure buruan oso presente daudela etorri da Auzitegiaren ebazpena. Israelen azken sarraskiaren aurrean gertatu bezala, Nazioarteko instituzioek denon begietara begi-bistatakoa dena zigortzeko ezintasuna adierazi dute berriz ere. Israel giza eskubideen urraketa sistematikotik gerra irekira igaro den aldiro, Europar Batasunaren, Nazioarteko Auzitegiaren edo Nazio Batuen Erakundearen gaitzespenak entzun ditugu. Zeinek oroitzen du, ordea, berriki Errusiari ezarritako zigor ekonomiko eta politikoaren antzeko bat Israelen aurka? Epaiak epai, goian ikusgai duzuen David Segarrak zuzendutako Fuego sobre el marmara dokumentalak argi erakutsi zuen Israelen asmoa: urtetik urtera handitzen eta esparru berrietara hedatzen ari den Palestinarekiko nazioarteko elkartasuna beldurtzea. Baina ez dirudi sionismoari jokaldia oso eraginkorra suertatu zaionik, Gazako erasoak mundu mailan sortu duen azken elkartasun olatua ikusita.