Nola idatzi amodiozko poemak (ia) erromantizismoan erori gabe

Atalak: Gaudeamus, Poemak

Errezetarik ez, noski. Baina aste honetan bi poema maitasunaren inguruan irakurri ditut eta hemen paratzea otu zait. Lotsarik gabe, ikusgai. Lehenengoa, oraindik itzuli ez dudan Mailu isila (Alberdania, 2003) liburutik. Honelaxe dio Juan Kruz Igerabidek:

Hezur-muinetik maitatu,
ez bazterretik, ez halako trebeziaz
non maitasuna joan eta
trebezia hutsa geratzen den.

Ezti edo ozpinetik honaxeagoko amodioa,
aingeruetatik eta deabruetatik honaxeagokoa,
txirotasun zein aberastasunetik honaxeagokoa,
apainkeriarik nahiz tortikarik gabea.

Gaztaroko argazki bat: hura,
haren gorputz argia, haren arima gardena
–gela honetan eguzkiaren errainua
sartzen denero berpiztua–,
ohearen gaineko estalki malenkoniatsua
eta errealitatera esnatzeko iratzargailua.

Bigarrena irudi poema da, Edo! argitaletxeak atera berria: Lorena Martinez Oronoz-en Maite dut. Kasualitatez edo, egilearen lehenengo liburua izan zen Juan Kruz Igerabiderekiko elkarlan bat, Mintzo naiz isilik (Elkar, 2002). Liburu-kutxa zabaldu eta bulegoan jarri dut poema, ikasle eta lankideek ikus dezaten: