Etxeko sukaldean arazoa azaldu, kausen hipotesiak egin, konponbideak proposatu, logelaraino jarraitu, jaramon faltagatik ia oihu egin, espazio handia okupatu beso keinuez, alde egin. Aurrean, isil bat.

Ikasturtea amaitu hamaika bileraren ondoren; iritziak eman, agerian geratu, ardurak hartu, arazoak eduki, arazoak azaldu, arduradunen aurrean hitz egin, parte hartu gaia proposatu duena bakarrizketan gera ez dadin. Aurrean, isilak.

Erasoa seinalatu, bilerak deitu kideekin, elkarrizketak eduki, adituekin kontsultatu, “-tzaileei” aurre egin, oihuka zikindu, ahotsa ez goratzeko entrenatu, abokatuaren aurrean lasai hitz egin, erori, altxa. Inguruan, isilak.

Pertsona onak, xaloak, umilak isilak. Diskretuak, dotoreak, fidagarriak isilak. Zuhurrak, azkarrak, jakintsuak isilak. Lasaiak, pentsalariak, orekatuak isilak. Hori guztia isilak, besterik interpretatzen ez dakienaren begietan. Hori guztia isilak, beste isilentzat.

Zuentzat isilak. Zuentzat, balitekeenez ezkutuko berekoi indibidualistak  izatea, itotzen ari bazara ere irribarre xalo batekin begiratuko dizutenak (edo inozoa, edo psikopatikoa). Isildu gabe entzuten didaten presentzia erridikulu, desorekatu eta zikinak hobe. Hitz bakoitzean bizitza jartzen dutenak.