Aste honetan bileratxo bat izan dut lankide ohi batekin, zeinak lan egiten duen bazterkeria egoera eta arrakala digitalaren inguruan, beste arrakala askoren artean. Digitalitateak sortzen dituen arrakala eta bazterkeria eredu berriekin borrokan aritzen da egunero. Bere elkartean Microsoft 360 darabilte eta Copilot AA ere zabalduta dago elkartean. Hausnarketa sakonak egiten ditu, gauzak ez ditu etortzen diren moduan besterik gabe hartzen. Subiranotasun teknologikoaz hitz egiten geundela, zenbait aditurekin ardurak partekatu ondoren subiranotasun teknologikoa oso konplikatua ikusten duela aitortu dit. Amerikako Estatu Batuek eraiki duten eredua hemen errepikatzea oso konplikatua dela, alegia. Berdina? Nork esan du, ordea, berdina nahi dugula? Pentsatzen hasi naiz. Nork nahi ote du AEBetako oligarken zerbitzarietara munduko datu ustiaketa bideratzen duten informazio autobideak bertako oligarken menpe jarriko lituzkeen eredu bat errepikatzea? Ez, ez gabiltza horretaz, ez gabiltza informazioaren autobideak errepikatzeaz, nodo burujabeak dituzten sareak sortzeaz baizik.

AEBetako eredu zapaltzaileak geurean bizitzen jarraituko dutela argi dut, merkatuak existitzen dira eta pertsonek aukeratzeko askatasuna izaten jarraituko dute, noski, baina burujabetzaren bidean paraleloki bestelako sareak sortzen ari dira jada, AEBetako eredu zibernetikoaren atzaparretatik urrun bizi nahi dugunontzako, digitalitatearen aukera emantzipatzaileak aztertzeko eta erabiltzeko bidea erein nahi dugunontzako.

Laguna harritu egin da esan diodanean Frantziako Gobernua administrazio publikotik Microsoft Office kentzen eta bere jarduera digitala Europan kokatutako zerbitzari eta software librera igarotzen ari dela. Andrea Alfarok El poder de Google llega a la escuela liburuan azaltzen zuen bidea.