Reimsen (Frantzia) aurkitutako III. mendeko mosaiko batean venatrix baten irudia identifikatu berri dute. Venatrixak anfiteatroetako eta zirkuetako ikuskizunetan animaliak zigorraz mendean hartzen zituzten emakume ehiztariak ziren, baina luzaroan zalantzan jarri izan da benetan existitu ote ziren.

Berez, mosaikoa 1860an aurkitu zuten; Lehen Mundu Gerran suntsitu arren, Jean Charles Loriquet arkeologoaren erreprodukzio fidagarriei esker gorde da mosaikoaren edukia. Baina ikerlariek venatrixa pertsonaia satirikotzat jo izan dute. Orain, irudia xeheago aztertu, iturri idatziekin alderatu eta, batez ere, begirada aldatuta, venatrixak benetan existitu zirela baieztatu dute.