Eskolan bagenuen binaka jolasteko mahai-jokoa: ezaugarri ezberdinak adierazita, zurekin jolasten zuen lagunak zituen pertsonaiak asmatu behar zenituen. Horretarako galderak egiten zenizkion pertsonaiaren ahalik eta informazio gehien jasotzeko.

Espainiako Gobernuak iragarri du plataforma digitaletan 16 urtetik beherako gazteen datuen erabilera gurasoen baimen espresu barik prozesatzea debekatuko duela. Arauak dio plataforma horiek adina egiaztatzeko sistema eraginkorrak ezarri beharko dituztela.

Egiaztatze sistema horiek sortzeak bitartekari berriak jartzen ditu datuen ustiaketaren “jokoaren” tableroan, plataformek prozesu hori ahalik eta modu eraginkorrenean aurrera eroan dezaten. Soluzio teknologiko hauek eskaintzeko, negozio eredu berriak asmatu daitezke. Dirudienez, eskuartean dituzten teknologiak dira, besteak beste, aurpegiak eskaneatuz adina egiaztatzea eta algoritmo prediktiboei lotuta adina zehaztea.

Nor da nor jakiteko negozioan, badira esperientzia handia dutenak, hala nola AEBetako ICE (Immigration and Customs Enforcement) zelataritza softwarea baliatzen duten Palantir enpresakoak, baina gertu dituzte beste hainbeste, hala nola Meta enpresakoak. The New York Times egunkarian diote Metakoek aurpegiak eskaneatzeko teknologiak euren betaurreko adimentsuetan jarri nahi dituztela. Ez da hain erraza, ordea, Europan behintzat, Datuak Babesteko Araudi Orokorrean badelako artikulu bat, 9.ena, zeinetan adierazten den datu biometrikoak prozesatzea debekatuta dagoela pertsonak bere onarpen espresua ematen ez badu. Zelan eman ordea onarpena, ez bazara jabetzen eskaneatuta izaten ari zarela? Betaurrekoak jarrita, aurrean duten guztia eskaneatzen dute? Betaurreko horiek Metako erabiltzaileengandik (Whatsapp, Instagram, Facebook... ) onarpenak bideratzeko moduak asmatuko dituzte, baina euren sareetatik kanpo daudenek zelan jakingo dute eskaneatuak izan diren?