Urte beroa datorkigu… eta ez bakarrik Mar-a-Lagotik gobernatzen duen Trump enpresariak lur honen sei kantoiak zorabio batean aztoratzen dituelako. Parioak egiten ahal ditugu jada: baietz Groenlandia eta Kanada AEBetako estatu soil bilakatu? Baietz Gaza Dubai berria bihurtu, palestinarrik gabe? Baietz El Chapo Guzmanen zelda berean Maduro sartu?

Urtarrila hondar honetan hainbat manifestaldi gurutzatu ditut Baionan, merkantilizaturiko mundu honen ikarak, dudak, eskaerak plazaratze aldera. Kurduak ikusi ditut, banderak airean, Rojava herriaren etorkizuna zalantzan jartzen duen Siriako botere zentralaren ekina salatzen. Biharamunean, baxoa euskaraz pasatzeko eskubidea galdatzen duten ikastoletako gazteak hor ziren suprefeturaren aitzinean. Eta larunbateko merkatuan herri hauteskundeetara aurkezten diren Batzar Nazionaleko militanteak haizatu zituen “faxistak kanpora!” oihuekin antifa talde batek!

Besteak beste. 

Herrialdeak, hizkuntzak, pertsonak eta ideiak lanjerrean dira. Badirudi egoera honek bukaerarik ez duela, larrutzen gaituztenek betikoak direla ematen dutelako!