Erronka zaila dugu aurretik. Argi dago Donald Trump nartzisista patologikoa dela, eta ez duela enpatiarik. Hainbesteraino, non Bakearen Nobel saria galbideratzera ausartzen baita, jaso duenari xantaia egin eta bere buruari saria ematera behartuta. Gizateriaren historia hurbileko pasarte gutxi izan daitezke zekenagoak. Minnesotako fiskalak Reneé Good-en bikotekidea, ICEko agente batek odol hotzean hil zuen emakumearena, kriminalki ikertzera behartzearen parekoa izan daiteke. Hitlerren eta Trumpen arteko alderaketak egitea saihestezina da –oraingoz, lehen urteen alderaketa–.

1922an “Alkandora Arreak” sortu zirenean, alderdi naziarekiko leiala zen matoi taldea –SA bezala ezaguna–, Ernst Röhm buruzagiak honela deskribatzen zuen erreklutatzea: indarkeriarako joera duten gizon leialak, aurkariak beldurtzeko askatasunarekin, beren ekintzei inpunitatea ziurtatuz eta beste edozein lanetan lortuko luketena baino soldata handiagoa ordainduz. Greg Bovino-k, ICEko agintari nagusiak, errezeta hori aplikatzen die taldea osatzen duten 25.000 gizoni baino gehiagori. Bovino egunotan jaka marroi batekin paseatzen ari da Minnesotan, eta kasualitatez, nazien hierarkek zeramatenaren antz handiegia du. 2025ean, Trumpen bigarren agintaldiaren lehen urtean, 600.000 pertsona inguru harrapatu, migratzaileen kontzentrazio-esparruetara eraman eta indarrez deportatu dituzte.

AEBetako Segurtasun Nazionaleko Estrategia berria irakurri ondoren –abenduan argitaratu zen–, ondoriozta dezakegu Trumpek, hitz-jario kaotikoa izan arren, plan bat duela, eta konplizeak eta sikarioak dituela hori gauzatzeko. Bigarren Mundu Gerra amaitutakoan sortutako erakundeak suntsitu nahi ditu, eta mundu ordena berri bat sortu, morrontza ekonomikoaren eta menderakuntza militarraren bidez “bakea” inposatuta. Proba pilotua Nazio Batuen deslegitimazioa eta suntsiketa izango da, eta hori ordezkatuko du bere sikarioek gobernatutako Bakearen Batzorde moduko batekin. Hori da Gazaren kasua, Marco Rubio Estatu idazkariak Washingtondik eta Tony Blair Britainia Handiko lehen ministro ohiak Londrestik gobernatzea nahi baitu. Trumpen suhia, Jared Kushner, izango litzateke berreraikuntzaren negozioaren arduraduna eta onuraduna; mafiako klanen tankerako izendapena. Funtzionatzen badio, errezeta bera aplikatuko du Ukrainan eta Venezuelan. Zalantzarik gabe, Nicolás Maduro eta Cilia Floresen bahiketa akats-kate baten emaitza izan zen, Trumpen mehatxuak gutxietsi zituztelako.

Etxe Zuriko nagusiak, erregimen berri hori ezartzeko, EBren suntsiketa behar du. Ez du ezkutatzen. Trumpen hitzetan, gainbeheran dagoen kontinentea da, eta “alderdi patriotikoak” besterik ez ditu begi onez ikusten, hau da, Santiago Abascalen Vox eta Silvia Orriolsen Aliantza Katalana barne hartzen dituen eskuin muturreko alderdiak. Instrumentalki behar ditu, ezegonkortasuna sortzeko eta Europako erakundeak barrutik lehertzeko, ekialdeko hegalean indartutako Vladimir Putin batek balio dion bezala. Groenlandiaz jabetzeko mehatxua zentzu horretan bakarrik irakur daiteke. Segurtasun nazionalaren edo baliabide naturalen apelazioak aitzakia dira, helburu nagusia Macron edo Merzen umiliazioa eta belaunikatzea da. Edo Washingtonen borondateak obeditzen dituzte mendeko herrialde gisa, edo etsai bihurtzen dira. Pedro Sánchez ez da ekuazioan sartu ere egin, eta, ziur aski, urtebeteren buruan amaitutzat joko du. Trumpen aurka borrokatzeko, beraz, lehentasunezkoa da bere ordezkari europarrak ahultzea, eskuin muturreko peoiak, erregimen berria hedatzen lagunduko diotenak. Eta, aldi berean, New Yorkeko, Chicagoko edo San Frantziskoko disidentzia politikoarekin koordinatu eta antolatu beharko gara. Horiek erortzen badira, Trumpek agintaldi erdiko hauteskundeak bertan behera uztea lortzen badu edo hurrengo hauteskundeak irabazten baditu, nahiz eta Marco Rubio, Pete Hegseth edo JD Vance-ren eskutik izan, kontrol sozialeko eta indarkeriazko mundu distopiko bat finkatuko da, berotze global geldiezineko ingurune batean. Hobe da haiek erori baino lehen meteoritoa erortzea.