Nazcako lerroak (Peru) bilatzeko adimen artifiziala erabili berri du Yamagatako unibertsitatea (Japonia) buru duen ikerlari talde batek, eta emaitza ikusgarriak lortu dituzte: duela 2.000 urte baino gehiago lurrean marraztutako beste 300dik gora lerro edo irudi topatu dituzte, orain arte ezagutzen zirenak ia bikoiztuz.

Gainera, oraindik baieztatzeke dauden beste 1.000 hautagai ere antzeman ditu AAk. Kopurua handitzeaz gain, lerroen interpretazioan ere lagun dezake ikerlanak, apaingarri isolatutzat jotzen zirenak, komunikazio eta erritu sare egituratu baten parte baitira orain.