ARGIA.eus

2021eko urriaren 22a

Egipto makillajeak batuta

Nagore Irazustabarrena Uranga @irazustabarrena
2011ko urtarrilaren 30a
Narmer faraoiaren paleta 64 zentimetro luze eta 45 zentimetro zabal da.
Narmer faraoiaren paleta 64 zentimetro luze eta 45 zentimetro zabal da.www.egyptian-gods.org
Egipto, K. a. 3050. Antzinako Egiptoko lehen faraoi Narmerrek egiptoar lurraldeak batu eta I. Dinastia fundatu zuen. Batasun horren xehetasunak eguneroko objektu soil batean, paleta kosmetiko batean jasota iritsi dira guregana.

Paletaren gainaldean Narmer gudu zelaia ikuskatzen ageri da, parean, bi ilaratan paratuta, burua moztutako etsai multzoa duela. Faraoiaren segizioko kideek hainbat probintziatako estandarteak daramatzate, eta behean Narmer ikus daiteke berriz, hazpegi asiarreko arerioa zapaltzen ari den zezen bihurtua.

Atzealdean, faraoiak giza itxura du eta Horus jainkoaren azpian belauniko dagoen etsaiari kolpeka ari da. Horusen eta etsaiaren artean Niloren deltaren sinbolo bat dago, lurralde hura jainkoaren eta, beraz, faraoiaren menpe zegoela adierazteko. Behealdean faraoiak aurrez mendean hartutako bi gizaki agertzen dira. Atzealdeko arerio horiek guztia ile luze kizkurra eta bizarra dute; egiptoar ikonografian libiarren ezaugarriak dira horiek.

Baina paletaren mezu guztiak ez daude gudu aferei lotuta. Gainaldean Narmerrek “koroa gorria” delakoa darama; Behe Egiptoko koroa, alegia. Azpialdean faraoiak beste forma bat duen koroa du buruan, “koroa zuria” deitua, Goi Egipto mendean zuela adierazten duena. Batasun mezu hori gainaldeko irudi nagusiak indartzen du; lepo luze eta bihurriak elkar gurutzatuta dituzten bi felino ageri dira. Irudi horren alegoria garbia da: bi erresumak, Goi eta Behe Egipto, errege bakar baten mendean, Narmer faraoiaren mendean daude. Eta, hain zuzen, horixe da paletaren zatirik erabilgarriena, lepoek eratzen duten zirkulua erabiltzen baitzuten makillaje hautsak nahasteko.

Horrenbestez, historiako inperiorik iraunkorrena abiatu zen eta historiako une gailen hura makillajeari lotutako objektu banal batean jaso zuten.
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Egiptologia

Egiptologia kanaletik interesatuko zaizu...

ASTEKARIA
2011ko urtarrilaren 30a
Azkenak EGILEA
Argia buletina
Egunaren laburpena
zure e-postan
Eguneraketa berriak daude