Fermin Muguruza: "Rokanrolaren historian talde bakoitzak bere belaunaldia bizi du"

1988ko irailaren 18an

"Kortatu" taldeko Fermin Muguruzari elkarrizketa.

"KORTATU" IRUÑEKO KONTZERTUAREKIN BUKATUKO DA, URRIAKO DISKO BIKOITZAREN ZUZENEKO GRABAKETAZ
Fermin Muguruza: "Rokanrolaren historian talde bakoitzak bere belaunaldia bizi du"
Lau urte t'erdian hiru disko luze kaleratu ondoren, "Kortatu" bukatu egingo dela ezagutzera eman da. Rock zaleen harridurak berriarekin batera egin du eztanda, zurrumurruak besterik izango ez diren esperantzaz. Ferminek argi baieztatu du: "Kortatu-ren historia hemen amaitzen da".
Moskun lotu ginen hizketarako. Egin egunkariko "Bat, bi, hiru" orrialdeetan iragarritako albistea Euskal Herri osora ez ezik atzerrira ere zabaldu da derrepentean. Ezin sinestuzkoa gehienentzat hasiera bateko berria jakiterakoan, batik bat Kortatu Kolpez Kolpe diskoa behin eta berriz entzun dutenen artean, Tolosako aurkezpenaren ostean burutu dituzten kontzertu apartak eta gero gainera.
"Ezin esan liteke arrazoi konkretu bat izan denik erabakia hartzeko", patxadaz heldu zion gaiari Ferminek "jakina, faktore ezberdin eta anitzak tartekatu dira". Ez da erraza guzti horien azalpena egitea "eta ez dut uste esplikazio moduko erantzunik ere eman beharra daukagunik. Bide bat burutu du Kortatu-k; hasieratik orain artekoa diskoetan barrena ikusten da, eta gure kontzertuetan izan den jendeak ezagutzen du".
The Jam, Stiff Little Fingers, The Clash eta beste hainbat taldek bere garaian halako erabakia hartu zuten bezalaxe, Kortatu ere bere taldekideen belaunaldiko fruitu eta adierazpenetariko bat izan da.
"Bai, rokanrolaren historian zehar talde bakoitzat bere denbora bizi du. Hori da politena niretzat. Kortatu izan dena izan da; oraindik ere badela uste dut, akaso puska batean ere bai. Baina honez gero, disko bikoitza zuzenean grabatu, gure benetako giroa jaso, eta hemen amaitzen da".
Ez dago inertziarako lekurik
Zalantzarik gabe, denbora laburrean oso kontutan hartzeko erreferentzia bilakatu da Kortatu euskal rockaren esparruan, ezin ahaztuzkoa suertatuko dela hemendik aurrera. Irundar hirukoteak abiatutako ibilbideak ezaugarri bereziak ekarri ditu musikagintzara, neurri handi batean jarrera hainbaten eragile ez ezik iragarle ere suertatu bait da.
Gogoan dauzkagu estraineso urratsek hasitako norabidea, eta denon ezaguna da urteotan mantendutako nortasuna ere. Baina egun
"ezer ez da lehen bezalakoa", Ferminek aipatu zion Bilbon Pablo Cabezari, "taldeetan ez bait dago jadanik hasierako izpiritu hura".
Areago zabalduz mintzo zitzaigun guri:
"gure lana alienantea bihurtzeko arriskua zegoen, musikaren munduko inguruneak inertziara bultzatzen du-eta kasurik gehienetan. Beti egin izan dugu talde dinosauroen kritika roilo komertziala esplotatzerako ordua ailegatuta. Guretzat erraza da kontzertuak egitea, disko gehiago gauzatzea, Europan zehar beste gira batzu...".
Azken aldian pentsatutako erretiroa
Maketak eta jaialdiak izan ziren lehenik, eta aurrenengo diskoarekin gero "tailer lan antzekoa izaten hasi zen". Hortik aurrera gero eta jende gehiagok hartzen du parte Kortatu-ren inguruan, alde batetik musika kreazioari lotuta dagoen taldea eta bestetik abarreko mediatizazio guztiak.
"Kortatu dimentsioa bereganatzen doan neurrian parasitoak sortzen direla somatzen duzu. Ekipoen jabe zurrupatzaileak, kritikoak –oso gutxi salbatzen direnak portzierto, hipokritak aurrez aurre eta atzetik makilazoa–, zirkuito diskografikoak... Hemen 'Basati Records' babarrik dago. Beste diskaetxeak multinazionalak bezalakoak dira. Hala ere 'Oihuka'rekin ongi konpondu gara".
Arrakasta komertzialaren kausaz ote zen, galdetu genion.
"Bai, beharbada", erantzun laburra.
Iazko udako AEKko barnetegian ikasten hasi orduko akaboaren zantzuak agertzen hasiak omen ziren. Lau hilabete jo gabe eta euskara ikasten. Hirugarren diskoaren atariko asmoak eta hartutako konpromezuak bidea burutzen lagundu zuten halaber.
"Euskaraz egin dugu azken diskoa. Baina errepertorioa zehaztua du Kortatu-k hasieratik egindako bidean zehar. Ezin dira alde batera utzi gaztelerazko kantuak eta ezin dugu talde euskalduna izan Kortatu gisan. Disko hau kaleratu aurretik beraz, bagenekien bukatutzat emango genuela".
Jendeak dena eskatzen du
Kortatu eta bere entzulegoaren artean estutu diren harremanak garrantzitsuak izan direla ezin ukatuzkoa da.
"Ez da ahaztutzen. Eta badakigu urriaren 1ean Iruñeko Anaitasunan egingo dugun zuzeneko grabaketan denok izango garela. Azken kontzertu hauetan aspaldiko jarraitzaile eta kolega hurbilekoenak gurekin izan ditugu. Egia da, nostaljia sortzen dela eta guzti hori. Baina, ez dakit, ematen du jendeak ez duela ulertzen. Eta pentsatzen dut batzuetan jendeak gurekiko eskubideak eta guzti dituztela uste izaten hasi direla. Ez dakit ongi esplikatzen dudan...".
Kosta egiten da mementu honen balorazioa egiterakoan kortatuzaleari hartutako erabakiaren prozesuaren nolakoa osoki azaltzea, esplikaziorik eman behar baldin bada ere.
"Begira. Badirudi poli-miliak garela eta burniak utzi ditugula, eta orain gainera prentsaurreko batetan esplikatu behar dugula. Baina motellak!, gu ez gara damutzen!".
Disko bikoitza datorren martxorako
Anaitasunako jaialdiaren aurretik oraindik Oñati eta Irungo kontzertuak egingo ditu Kortatu-k. Ondoren, zuzeneko grabaketa gauzatu eta diskoa merkatura ekartzerako hilabete batzu pasatu ohi dira, plastikora eramateko bitarteko lanean.
"89ko martxoan edo kaleratuko da. Egundoko ilusioa daukat. Errepertorioa egina dago, zer bai eta zer ez".
Azken aldian bezala, bertan izango da Kaki kitarraz.
"Gure soinua hobetu du eta kontzertu guztietan jotzen ari da gurekin, eta ez dugu nahi bera gabe jo nahi. Oso gustora nago bere seinuarekin".
Aniza denez, Ferminek ez du beste talde bat osatzeko inolako projekturik eskuartean.
"Pixkat nekatuta ere banago. Lan handia egin dugu denbora laburrean eta ia etengabeko jarraipenaz. Ez dut kantatzen segiko. Eta kontentu nago hartutako erabakiarekin".
Baina musikaz gozatzen duela ezin ezkutatu dezake, ez eta hizketan ari garela ere. Solasaldia bukatzerako bere etxean gaude dagoeneko. Eta disko bat jarri digu: Zimbabwe-ko talde bat, bigarren aldea.
GORKA ARRESE GARBIÑE UBEDA JOSU LANDA
"Kortatu"ren bukaerak denen atentzioa itzarri du.
Fermin Muguruza: "Motellak!, gu ez gara damutzen!".
48-49

GaiezKulturaArgitalgintArgitalpenaDiskoak
GaiezKulturaMusikaArgitalpenaDiskoak
GaiezKulturaMusikaMusika modeTaldeakKORTATU
PertsonaiazMUGURUZA1
EgileezARRESE1Kultura
EgileezLANDA2Kultura
EgileezUBEDA1Kultura

Irakurrienak

Matomo erabiliz

Athletic zuri ta gorria, zu zara nagusia, baina zertan?

Juan Aldaz Arregi

Izan bedi Nurenberg berri bat

Imanol Satrustegi Andrés

Kartzelako hormak zeharkatzen dituen ama-alaben arteko harremana hitz eta iruditara eramana

Estitxu Eizagirre

Jaioberrien orpo-proban gaitz gehiago aztertzera behartuko du Osakidetza Espainiako Gobernuak

Mikel Garcia Idiakez

Bollera subjektua erdigunean jartzera datorren hitzordua

Jenofa Berhokoirigoin

Azkenak

2024-04-28 | Jenofa Berhokoirigoin

BOLLOTOPAKETAK

Bollera subjektua erdigunean jartzera datorren hitzordua

Apirilaren 26, 27 eta 28 hauetan iraganen da Euskal Herriko bolleren topaketa, Leitza herrian. Izenak argiki dioen gisara bollerei irekitako jardunaldiak dira, baina, oro har, sexu/genero disidente oro da gomitaturik. Egitarau aberatsa eta askotarikoa ondurik, taldean... [+]

2024-04-28 | Olaia L. Garaialde

Gorputz hotsak

"Pianoa da konpainia izatea bezala, ez zara inoiz bakarrik sentitzen"

Musika klasikoa, regetoia eta rocka gustuko ditu Jakes Txapartegi pianistak (Hondarribia, Gipuzkoa, 2009). Itsua da, musika klasikoa jotzen du eta poliki-poliki jazza eta inprobisazioa ikastea gustatuko litzaioke. Etxean zuen teklatuarekin Pirritx eta Porrotxen “Maite... [+]

2024-04-28 | Axier Lopez

Dronea, munduko botere harreman desorekatuen ikur eta eragile

Giza asmakizun oro lez, onena eta txarrena egiteko gai dira. Baina, tamalez, dronea, beste ezeren gainetik, Mendebaldeko potentzia kapitalistek munduaren gehiengoa menpean jartzen jarraitzeko tresna nagusietakoa da. Zirrikitu teknologikoetatik haratago, funtsezko pieza da bizi... [+]

2024-04-28 | Miel Anjel Elustondo

Iñaki Soto. Erredakzioko kazetaritza ardatz

"Gure Herriaren etorkizuna eta hizkuntzarena batera joango dira"

25 urte beteko ditu aurten Gara egunkariak. Ez da erraz izan. Teknologiak ekarritako iraultzari neurria hartuagatik ere, Espainiako auzitegietako epaileek erabakitako oztopo arbitrarioek egunean eguneko jarduna baldintzatu dute. Mirari hutsa, Iñaki Soto zuzendariaren... [+]

2024-04-28 | Urko Apaolaza Avila

Migrazio eta Asilo ituna: Europaren legatu kolonialista denon begien bistan

Europar Batasunean berriki onartu den Migrazio Itunak, asko zaildu dizkie gauzak euren herrialdetik ihesi doazen eta asiloa eskatzen duten pertsonei. Eskuin muturraren tesiak ogi tartean irentsita, migratzaileentzako kontrol neurri zorrotzagoak onartu dituzte Estrasburgon,... [+]

Eguneraketa berriak daude