Asteazken honetan ekin zaio zinema-jaialdian abenduaren 31n kargua utziko duen Jose Luis Rebordinos ordezteko zuzendariaren bilaketa publikoari. Antolaketaz, Donostiako Zinemaldiaren administrazio-kontseilua arduratu da, Donostiako Udalak, Gipuzkoako Foru Aldundiak, Eusko Jaurlaritzak eta Espainiako Gobernuaren Kultura Ministerioak osatzen dutena. Batea enpresak eta "headhunting-ean espezializatutako giza baliabideen inguruko aholkularitza-enpresa batek" kudeatuko dute prozesua.

Hautagaiari ondorengo ezaugarriak edukitzea eskatzen diote: goi-mailako prestakuntza; ingeles “maila handia”; euskara eta gaztelaniaz “komunikatzeko gaitasuna”; esperientzia ikus-entzunekoetan eta sormenarekin lotutako erakundeen kudeaketan eta/edo zuzendaritza lanean; finantza eta aurrekontuetan trebetasuna; lidergo-gaitasuna; eta ezagutza izatea taldeen kudeaketan, negoziazioan eta komunikazioan. Gainera, frantsesa jakitea baloratuko dute. Izena emateko, curriculum vitae-a eta aurkezpen-gutuna bidali beharko dira Batearen webgunera, galdetegia betetzearekin batera.