Lehiaketa publikoa egin ondotik, Donostiako Zinemaldiaren Administrazio Kontseiluak –Donostiako Udala, Gipuzkoako Foru Aldundia, Eusko Jaurlaritza eta Espainiako Gobernuaren Kultura Ministerioa– aho batez onartu du Maialen Beloki (Donostia, 1983) izendatzea Zinemaldiaren zuzendari. Beloki zuzendariordea izan da 2016tik; José Luis Rebordinosekin egin du lan eskuz esku.

Belokik funtsezko eginkizuna izan du jaialdiaren nazioarteko posizionamenduan, baita urte osoko jardueren garapenean ere. "Z365/ Urte osoko Jaialdia" eredua bultzatu du, eta lan egin du talentu berrien garapenean, prestakuntza zinematografikoan eta zinemaren inguruko pentsamenduaren sorkuntzan oinarritutako ekimen estrategikoan. Formakuntza aldetik, Ikus-entzunezko Komunikazioan lizentziatua da Nafarroako Unibertsitatean, eta doktore titulua ere badu EHUn egindako Zinema Teoria, Analisi eta Dokumentazio gaietan. Irakasle gisa ere egiten du lan Donostiako Elías Querejeta Zine Eskolan, eta bertako Zuzendaritza Akademikoaren parte da. Lan ibilbidean, besteak beste, Donostia 2016 Europako Kultur Hiriburutzan egin du lan.

Rebordinosek abendu honetan hartuko du erretiroa. 2011tik izan da Zinemaldiaren zuzendaria, eta irail honetan egingo den 74. edizioa izango da Rebordinosen azkena. Belokiren lehenbizikoa, 2027koa, 75. edizioa izango da.