Bilketarako azalpenetan adierazten dutenez, “ez dugu nahi eta ez dugu onartuko sekula, azala utzi arte borrokatuko gara, gure seme-alaben osasuna arriskuan baitago”. Dagoeneko ekimenak gainditu du mila lagunen langa. Ondoko esteka honetan egin liteke bat ekimenarekin: Erraustegia geratu.

Noauan irakur daitekeenez, sinadura bilketa hau babesteak duen garrantzia nabarmendu dute kanpaina honen sustatzaileek. “Erraustegia hondakinak tratatzeko azken aukera da, ez baita jasangarria ingurumenarentzat, ezta osasuntsua bizidunontzat ere, arriskutsua baizik". Erraustegia eraiki nahi duten zero gunetik “potentzialki larria da 10 kilometro baino gutxiagoko eremuan bizi direnentzat eta kaltegarria orohar, guztion atmosferak jasan behar dituen isurketengatik”. Gurasoek gogorazi dutenez, erraustegia eraiki nahi den 5 kilometroko eremuan 26 ikastetxe eta 9.044 ikasle daude, 7,5 kilometrotara 72 ikastetxe eta 25.191 ikasle; 10 kilometro baino gutxiagora, 125 ikastetxe eta 44.314 ikasle. "Badira, halaber, ospitale, parkeak, eta kilometro batera baino gutxiagora dauden udalerriak ere”.

“Ama gisa partikularki eta gurasoak orohar, zuen sinadura behar dugu”, azpimarratu du sarean bilketa bultzatzen duten amak. Zehazten du baita ere erraustegiek kontrolaezina den gastua eragiten dutela. Presaz, arriskuez informatu eta kontsultatu gabe eraiki nahi dutela aipatu planta,  baina ez dutela halakorik onartuko, seme-alaben osasuna arriskuan ikusten dutelako.