Zaballako espetxeko preso talde batek salatu du haizagailuak erostea debekatu diela espetxeko zuzendaritzak, Euskal Herrian ez duela "horrenbesteko berorik" egiten argudiatuta. Presoek jakinarazi dutenez, joan den asteko bero boladan, ziegetan gauerdian 29 graduko tenperatura izan zuten.

Presoen hitzetan, eguneko eta gaueko ordu asko ematen dituzte ziegan itxita eta bertan ez dago haize korronterik; tenperatura "jasangaitzak" pairatzen dituzte. "Egunez egin duen beroa espetxeko hormen zementuan mantentzen da". 

"Sinesgaitza bada ere, 2026an eta Gasteiztik kilometro gutxi batzuetara, haizagailu bat erostea debekatuta dago. Kalean egoera horren aurrean beharrezkoa den toki guztietan ezohizko neurri eta plangintzak garatzen ari direnean bitartean, guri, presoei, baztertuta uzten gaituzte", salatu dute. Azpimarratu dute, halaber, beste espetxeetan haizagailuak eros daitezkeela. 

Ez da lehen aldia presoek haizagailuak erosteko eskatu dutena. Iaz ere bero boladak izan zirenean zuzendaritzari eskatu zioten haizagailuak kanpoan erosteko baimena. "Ezezko borobila jaso genuen". 

Urtebete igaro da eta eskaera bera egin diote zuzendaritzari, pertsona askoren osasun egoera eta adineko pertsona asko dagoelako tarteko eta hori kontuan hartzeko. Zuzendaritzak ezezkoa eman die. Presoek adierazi dute bien bitartean espetxeko funtzionarioei haize egokitua jartzen dietela.