Yakolev 42 street-punk talde oiartzuarrak komunikatu bidez jakinarazi du duela bi aste beraien aurkako salaketa artxibatu duela epaileak. Magistratuak legea jarraituz arrazoitu du  "gorroto delitua gizarteko kolektibo zaurgarri bati eragiten dioenean" izaten dela, "enpresariak, erregea, polizia eta alderdi politikoak ez dira kolektibo zaurgarriak", eta ondorioz, ebatzi du hitz horietan ez dagoela gorroto deliturik. Taldekideek bi urte hauetan "alboan egondako guztiei eskerrak" eman dizkiete, eta "musika antifaxista" egiten jarraitzeko indar handia jaso dutela adierazi dute.

2024ko otsailean bi taldekidek eta, egun batzuk beranduago, gainerako taldekide eta taldekide ohiek jakin zuten ikerketapean zeudela, Guardia Zibilak ondutako ikerketa batean oinarrituta. Txosten horretan, musika taldeari leporatu zieten "ikuspegi ideologiko berarekin bat ez datozen guztienganako gorrotozko diskurtsoa elikatzea". Guardia Zibilaren arabera, gorroto diskurtsoa dago "abestien letra guztiz iraingarri eta intoleranteetan", kontzertuetako "zenbait jokabidetan", eta "indarkeriaren etengabeko goraipamenean". Ondorioz, 2024ko maiatzaren 6an sei kideek Donostiako Instrukzio epaitegian deklaratu behar izan zuten, ikertu gisa. Yakolev 42-k sare sozialetan partekatu zuen komunikatuan azaldu zuten Guardia Zibilaren ikerketa akusazio bihurtuz gero, "urtebete eta lau urte arteko espetxe zigorrak" eska zitzaketela kide bakoitzarentzat.

Deklarazioaren egunean, kautelazko neurri gisa, behin-behinean abestien hitzak internetetik ezabatzeko eskatu zion fiskaltzak musika taldeari. Berria-k jakitera eman duenez, taldekideek, Iker Sarriegi abokatua lagun, neurri horren aurka agertu ziren lehen unetik: "Azken finean, guk oso argi ikusten genuen ez zegoela deliturik. Beraz, ez bagenuen kontzerturik ematen, eta kanta horiek kentzen bagenituen gure errepertoriotik, emango zuen onartzen ari garela zerbait gaizki egin dugula agian", adierazi zuen Sarriegik. Orduz geroztik, kasua geldirik egon da ia bi urtez, "ezjakinean", taldekideen hitzetan. Baina horrek ez du ekidin taldeak aktibo jarraitzea oholtza gainean, adierazpen askatasuna aldarrikatzen.