Hainbeste erabiltzaile ere ez zeuden WhiteDate.net horretan, 8.000 munduan, eta Euskal Herrian gizonezko 6 profil zeuden. Maparen bidez aurki daitezke horiek, besteak bezala. Eta erabiltzaile askoren kasuan, kargatu zituzten selfiak ere geokokatuta zeudenez, kasu batzuetan pertsona horien bizilekuak ere egin dira publiko. Euskal Herriko profilen kasuan, etxeko helbiderik ez, baina pertsonaren bat identifikatzeko modukoa egon badago.

Webgune horretan ligatu nahi omen zuen pertsonen profila ezagutzeko, euskal erabiltzaile horietako batek aurkitzea espero zuena deskribatuko dugu: "Natura, itsasoa, animaliak eta kirolak maite ditut, eta emakume BIRJINA (hau funtsezkoa da) baten bila nabil, genetikoki puru-purua izan behar dena. Pertsona horrek nahiko luke haur zurien familia handi bat hazi, naturaz inguratuta. Noski, arrazari garrantzia ematea funtsezkoa da niretzat, eta espero dut gune honek norbait ganorakoa aurkitzen laguntzea, bizi garen gizarte mendebaldetar dekadente honetan".  Txoropito honek lau haur baino gehiago eduki nahi duela zehazten du.

Inork klikatuko ote zuen bere profilean? Zaila dirudi. Itxura batean profilen %90 gizonezkoak ziren, eta %10 emakumezkoak, eta harreman heterosexualak zirenez itxura batean izena eman zutenen esperantza, ba zaila zeukaten ratio horrekin. Azken batean dirua galtzeko plataforma bat, harpidetza ordainduz gero. Hacker filtratzaileak adierazi bezala, "sexu ratioari begiratuta, Pottokien herrixka paradisu feminista bat litzateke konparazioan".

Ikusi disparate honen arrastoa hemen: OkStupid.LOL/

Bide batez esan, Ok Stupid izenak erreferentzia egiten diola ligatzeko beste webgune bati, Ok Cupid.