Jendetza bildu du deialdiak, ostalariek adierazi ostean gisa horretako bilkurak egiteko gune konkretuak egokitu beharko liratekeela itsas-pasealekuan, eragiten duten zarata edota zikinkeriak turistak uxa ditzakeelako. Turismoaren gaiak denbora zeraman mahai-gainean, eta Malvarrosako enpresarien elkarteko buru José Mirallesen hitzek txinparta bizitu besterik ez dute egin.

Malvarrosa bertako eta gainerako auzoetako (Cabañal, Nazaret, Grau-Port eta L'Illa Perduda) herritarrek eskatu dute itsas-pasealekuan egingo dituzten eraberritze-obrek "aintzat har" ditzatela" bertan hainbat belaunaldi bizi izan den jendearen ohiturak". Salatu dute auzoetan obra ugari egiten dela, baina gehienetan izaten direla etxabeak zein eraikin osoak pisu turistiko bihurtzeko. "Pertsonentzako hiria izatea nahi dugu, espazio publikoaren merkantilizazioaren aurrean", adierazi du Malvarrosako bizilagunen elkarteko presidente David Verdoyk, "hondartzak, etorbideek, auzoek... auzotarrenak izaten jarrai dezaten".

"Ez dugu nahi gure hirian auzotarrei mugak jartzea", azaldu dute larunbateko hitzorduaren antolatzaileek, eta gaineratu dute kalean afaltzen duen jendeak "zintzo-zintzo" jaso eta garbitzen duela guztia. Asteburuan egindako otordu jendetsuan Compromís eta Valentziako Alderdi Sozialistako ordezkariak izan dira, besteren artean.

Vilaweb.cat agerkariak ekimenaren bueltako hainbat bideo jaso du.

Sozializatzeko modua

Sopar a la fresca ez da soilik kalean afaltzea. Senide eta lagunekin sozializatzeko modua ere badira, udako egun beroetarako plana, apurka-apurka auzotarrei kentzen zaizkien espazioak harremanetarako baliatzea.

Valentzian bezala, Mallorcan ere ohitura dute Sopars a la Llesca otorduak egiteko eta, Valentzian bezala, azken asteetan espazio publikoa denentzat izateko aldarria eraman dute kale eta plazetara, Brunzit kolektiboak deituta. "Espazio publikoa okupatzeko aukera geroz eta gutxiago dugu, geroz eta zailagoa da bertakoentzat, eta errazagoa kanpokoentzat", kexu dira herritarrak: "Ia ezinezkoa da kalean lasai esertzeko lekurik topatzea, deus kontsumitu gabe; geroz eta zailagoa da espazio publikoan elkar harremantzea, komunitate izaera galtzea dakar horrek".