Urumeako mendietan "Ikatz Gane" deituriko eoliko erraldoien proiektua egin asmo dute Enigma eta Arena Green Power enpresek –horien atzean Endesa multinazionaleko karguak daude–. 33 MWko bost errota handi aurreikusten dituzte Pagalegi eta Etxolaberri inguruetan, Ereñotzutik gora, Hernani eta Arano udalerrien arteko mugetan. 

Proiektuari alegazioak jartzeko epea zabalik da maiatzaren 4ra arte, eta Urumea Bizirik elkarteak "herri-alegazioak" jartzeko dokumentua egin du, herritarrek sinatu eta Eusko Jaurlaritzako Industria, Trantsizio Energetiko eta Jasangarritasun Sailean aurkeztu dezaten. 

Dokumentu horretan salatu dutenez, eskala handiko halako proiektuak ez dira bateragarriak bertako energia komunitarioaren kudeaketarekin, "espekulazioa" baino ez dutelako sortzen. Gainera, proiektuak Urumeako mendien "industrializazioa" ekarriko luke, baita "landa eremuaren pobretzea" ere.

Ingurumenean eragin handia izango duela diote, besteak beste Aiako Harria Parke Naturalaren eta Leitzarango Biotopoaren artean dagoen korridore ekologikoa "arriskuan" jarriko duelako, eta bertako landaredian, espezie endemikoetan eta faunan zein akuiferoetan inpaktatuko duelako zuzenean. 

Gardentasun falta eta legezkotasuna zalantzan

Urumea Bizirik-etik auzitan jarri dute proiektua bera aurkezteko prozedura, "informazio gabezia" eta "gardentasun falta" handia izan direlako euren esanetan, eta herritarrak "babesik gabe" aurkitu direlako.

Kalteturiko udalei azken momentura arte kontsultarik egin ez izana ere traba handia izan da alegazioak jartzeko orduan, epemuga "motzak" direla-eta; eta diotenez, "makroproiektu bakarra dena –Euskal Herriko handiena litzatekeena– bost konexio desberdinetan zatituta" aurkezteak, bestalde, prozedura bera legezkoa ote den zalantzan jartzen du.

Mugimendu ekologistako kide batek aurkezturiko beste alegazio mardul batean salatu du proiektua ez datorrela bat Hernaniko hirigintza-planak kalteturiko eremu horri aitortzen dizkion balioekin eta derrigorrezkoa litzatekeela plan berezi bat egitea, baina horretarako udalaren baimena beharko lukeela.