Orotara 12,9 milioi boto inguru lortu ditu De la Espriellak (%49,66), eta 12,7 milioi (%48,70) Cepedak. 250.000 botoren aldea dago bien artean, 0,96 puntukoa. Parte-hartzeari dagokionez, Kolonbiako presidentetzarako hauteskundeetan orain arteko herritar kopururik handienak bozkatu du: 26,3 milioi lagunek, %63,7 inguruk. Bestalde, 426.000 herritarrek baino gehiagok eman du boto zuria, bi hautagaien arteko aldearen bikoitzak ia.

De la Espriella eskuindarrak, zeinak harreman zuzena duen Amerikako beste agintari batzuekin, Javier Milei, Nayib Bukele edota Donald Trumpekin, esaterako, Kolonbiarentzat "aro berria" zabalduko dela adierazi du. Kanpainan zehar zergak jaitsiko dituela agindu du De la Espriellak, burokrazian murrizketak egin eta segurtasun arloan gogor jokatu, besteak beste.

Kontaketa, inpugnatua

Hauteskundeen lehen itzulian 650.000 botoren aldea atera zion De la Espriellak Cepedari. Bigarren itzulian, baina, nabarmen murriztu da aldea, 250.000 botora. Emaitzak berrestekotan, oposizioa gidatzeko posizio onean geratuko litzateke Cepeda, Pacto Histórico alderdiko Gustavo Petro jarduneko presidenteak kargua utziko duenean. Ikusteke dago, ordea, ezkerreko indarrak batzen dituen koalizioak nola bizirauten duen, joera desberdinak batzen dituen presidentearen figurarik gabe.

Dena dela, bigarren itzuliko emaitzak ez dira oraindik ofizialak, eta Capedak iragarri du 33.000 mahaietako emaitzak inpugnatuko dituela, berrikusi beharreko irregulartasunak atzeman dituztelako. Halaber, jarduneko presidente Gustavo Petrok ere zenbaketa ofizialaren zain egon beharra dagoela esan du, "irregulartasun asko daudelako". Besteak beste, adierazi du Erregistro Nazionaleko zerbitzarien IP helbideetan ustez egin diren aldaketen inguruko frogak dituela.

Oraindik ofizialak ez izanik ere, emaitzek argi erakusten dute Kolonbia bitan zatiturik dagoela. Boto gehien lortu duen hautagaiak sekula ez du alde hain txikiarekin irabazi.