Asteazkenean goizean aurkeztu dute Bilbon Bada Garaia ekimena, GKS, Etxebizitza Sindikatuak eta Bilboko Luberri Konpartsak. Bertan, sare sozialetan kaleratu duten abestia aurkeztu dute Javier Jorajuria J Martinako taldekideak, eta Maixa, Kiliki eta Malakias musikariek. 43 kulturgile euskaldun inguru izan dira abestiaren bideoklipean azaldu direnak. Mugimendu Sozialistak Bilbon eta Gasteizen txosnak jartzeko eskakizuna luzatu du beste urte batez: “berdintasunean eta diskriminaziorik gabe normaltasunez parte hartzea”. Ez da lehen aldia kulturgileen babesa jaso dutena aldarria egiteko.

Jorajuriak Gasteizko eta Bilboko txosnetan duten “beto zentzugabea” salatu du: “Badira urte batzuk Bilbon Luberri konpartsari eta Gasteizen GKSri eta Etxebizitza Sindikatuari txosnetan normaltasunez parte hartzeko aukera ukatzen zaiela”. Horren aurrean, udan txosnetan abestia “ozen entzutea” espero dutela jakinarazi du, “beto zentzugabe honi irtenbide bat ematea eskatzen dugun guztion oihu bezala”.

Abestia Kiliki, Mirua, Maixa eta Malakiasen artean sortu dute nagusiki eta bideoklipean Anje Duhalde, Bernando Atxaga, Josu Zabala, Roberto Moso, Neomak, Antton Telleria, Beñat Herdoil, Euskoprincess eta Borla bezalako sortzaileak ageri dira.

Ekainaren 4ean eskainiko dute lehenengoz zuzenean, Bilboko Kafe Antzokian antolatu duten jaialdian. Bertan, “betoa” salatu eta aldarriarekin bat egin duten kulturgileen zerrenda aurkeztuko dute.