Multinazionalak informazio gehiago eman du Balore Merkatuaren Espainiako Batzordean (CNMV) plazaratutako txostenean: 274 pertsona kaleratu nahi dituzte Amurrion (Araba) eta 27 Trapagan (Bizkaia). Enpresak aurkeztutako bideragarritasun planak hiru ardatz izango ditu: merkatuaren dibertsifikazioa, kostuen murrizketa eta zorraren txikitzea. Azaldu dutenez, 2025ean abiatu zuten kostuen murrizketa, AEBetako lantegiko jarduna geldituta. Gaur egungo egoerak, aldiz, "neurri berriak" hartzera eraman du enpresa, "hala nola Amurrioko altzairutegia pixkanaka gelditzea, totxoa eta lingotea egiteko lanak kanporatzea eskariaren portaerara egokituz, eta produkzio-prozesuari eta zeharka eragiten dieten beste arlo batzuei lotutako langileen irteerak egotea". 

Zehaztu dutenez, "faseka" kaleratu nahi dituzte 301 langileak (87 behin-behineko kontratuekin eta 214 kontratu finkoekin), "inpaktu soziala txikituz eta modu progresiboan". Izan ere, "hornitzaile lehiakorren bilaketa" abiatu nahi dute aldi berean.

Mobilizatzera deitu dute sindikatuek

ELAk espedientea "berehala" kentzea eskatu eta greba mugagabera jotzea proposatu du. "Enpresak alegatu nahi dituen arrazoiei buruzko dokumentazioa zorrotz aztertuko dugu", adierazi du. "Urtarrilaren 9ak balio izan du Amurrioko zentroko Tubos Reunidoseko langileek deitutako grebarekin bat egin dezaten. Otsailaren 13an beste greba egun bat dago deituta, Eusko Jaurlaritzako Industriako arduradunekin izandako bilera aprobetxatuz".

LABek ere erregulazioko espedientea bertan behera uztea exijitu du, eta salatu du zuzendaritzak "bere kudeaketa negargarriaren ondorioak" langileei ordainarazi nahi dizkiela. Sindikatuak azpimarratu du egungo egoera ezin zaiela kanpoko faktoreei soilik egotzi, baizik eta urteetan zehar pilatutako enpresa erabakien ondorio dela. Gogorarazi du enpresak diru laguntza publiko handiak jaso dituela, zenbait garaitan dibidenduak banatu dituela eta une kritikoetan babes instituzionala izan duela. "Bidegabea iruditzen zaigu orain langileek kaleratze eta lan murrizketen bidez ondorio horiek bere gain hartu behar izatea". Irtenbide bakarra "plantillen antolakuntza eta mobilizazioa" direla dio.

Ildo berean mintzatu da ESK sindikatua: "Ez ditugu onartzen ez enplegu-erregulazioko espedientea, ez kaleratzeak, ezta gure lan-baldintzen okertzea ere. Langileei batasunera deitzen diegu enpresari aurre egiteko eta Trapagarango eta Amurrioko lantegien etorkizunaren alde borrokatzeko". Zuzendaritzak, beste behin, bere "aurpegirik gordinena" erakutsi duela dio. "Espedientearen asmoa ez da soilik gure lanpostuen aurka egitea; langileen aurkako iraina da, eta lortzea hainbeste kostatu zaigun lan-eskubideak murrizteko beste ahalegina".

Arabako diputatu nagusiak, Ramiro Gonzálezek, bere kezka eta babesa adierazi die Amurrioko Tubos Reunidoseko langileei, baita Aiaraldea osoari ere. Gonzálezek azpimarratu du "egoera zaila bizi duen eskualde batentzat kolpe gogorra" dela, eta lehentasuna enpresaren eta langileen etorkizuna bermatzea dela nabarmendu du. Ildo horretan, egoerari epe ertain eta luzeko ikuspegitik heltzeko deia egin du: "Erreakzio sutsu eta epe motzekoetatik aldendu behar dugu, eta Arabako enpresa historiko baten bideragarritasunean pentsatu; izan delako eta izaten jarraitzea nahi dugulako Aiaraldeko jardueraren eta enplegu industrialaren motor".

Arabako PSE-EEk ere elkartasuna azaldu die langileei, eta Aiaraldean enplegua eta industria babestuko dituen konponbidearen alde egin du. Javier Hurtado idazkari nagusiaren hitzetan, alde guztiei dagokie erantzukizuna hartzea. "Konponbideak etorri behar du aldeen arteko negoziazioetatik, ez da traumatikoa izan behar, eta berme legal guztiak izan behar ditu".

Astelehenean, 24 orduko greba