Euskal Herrian Euskarazek deituta, topaketa internazionalistak eginen dituzte ostiral honetan Baionako Biltxokon. "Kulturen erresistentzia eta erresistentzien kultura" gaia emanda ariko dira hausnarrean Bretainiako, Ipar Kataluniako, Korsikako, Okzitaniako eta Euskal Herriko hainbat aktibista. Topaketak biharamunean segituko du, 10:00etan, "frantses konstituzio linguizida" gogoeta-gai hartuta. Frantziako Estatuko hizkuntza autoktonoak gutxiengo egoeratik ateratzeko borroka elkarrekin eramateko deia luzatuko dute topaketa horietatik.

Bertatik Departamenduaren egoitzaren aitzinera joanen dira, otsailaren 5ean epaituko dituzten EHEko lau kideei elkartasuna adierazteko. Irailean buruturiko ekintza sinboliko batengatik epaituko dituzte: irailaren 27an, egoitza horren paretan Euskaraz bizi nahi dugu margotzeagatik. Euskarak ofizialtasunik gabe segitzen duenez Ipar Euskal Herrian, auziperatei euskaraz aritzeko aukera ukatzen zaie. Gehiegikeri hori salatu zuten abenduan, Baionako auzitegitik pasatako hainbat militantek.