Iruñeko Udalak bertako Erorien Monumentua memoria zentro bilakatzea aurreikusten du. Honen aurrean, Orreaga Fundazioko eta Erorien Monumentua botatzearen alde egiten duten kolektiboetako kide Koldo Amatriak errekurtsoa aurkeztu zuen eta Nafarroako Administrazio Epaimahaiak ukatu egin du. Errekurtsoa Administrazio Auzira aurkeztu dezakete.

Udalak eraikinari esanahi berria emateko helburuarekin, Udal Plana eraldatu du. Noticias de Navarrak jaso duenez, elkarteek aldaketak “baliogabeak” direla salatu dute eta hiru arrazoi adierazi dituzte errekurtsoa aurkezteko: lehenik, “indarrean ez dagoen eta eraginkorra ez den araudia aldatu nahi duelako Udalak, Nafarroako Aldizkari Ofizialetan argitaratu ez dena”; bigarrenik, “Erorien Monumentuaren ingurua berriro antolatzea eta urbanizatzea duelako helburu aldaketak, eta ez da hirigintza-tresna eskuduna” eta, hirugarrenik, “ez da bete herritarrek aldez aurretik parte hartzeko izapidea”.

Udalak azaldu du 2002an Yolanda Barcina alkate zela onartu zela Iruñeko behin-behineko Plan Urbanistikoa eta ez zirela “ez fitxa ez planoak” argitaratu. Udaleko iturri batzuen esanetan, garai horietan ez zen informazio horren berri ematen. Hortaz, plana “baliogabea” izan beharrean, “eragin gabea” dela adierazi dute eta orain argitaratzea pentsatzen ari direla azaldu dute. Aurreikusitako aldaketekin ez dutela “urbanizazio berri bat” egiteko asmoa azaldu dute, eta ondorioz, ez litzatekeela prozesu parte hartzailerik egin beharko.