Konboia egunak zeramatzan blokeatuta Libian, Indar Armatu Arabiarrek eta ekialdeko Libiako agintariek muga zeharkatzea eragotzi dietelako, eta igande gauean egin diote eraso. Kanpamenduko jendea kolpatu eta ibilgailuetan sartzera derrigortu dituzte bortizki, Aiaraldeak jaso duenez. Ondoko meskita batean babestu diren 23 emakumeri gasa bota diete eta arrastaka atera dituzte bertatik. Ez dago zauritu larririk, baina hainbat kide ospitalean daude zauriak artatzen. 

Ez dago argi zeintzuk izan diren erasotzaileak. Konboiaren antolatzaileen esanetan, Libiako mendebaldeko agintariekin harremana duten indarrak izan daitezkeela jakinarazi diete bertako herritarrek. Beste eraso bat jasatea ekiditeko, kanpamendua utzi eta Libiako hiriburura, Tripolira, itzuliko dira. Bertan erabakiko dute zer egin. Bertako partaideen artean euskal herritar bat dago, Haizea Urkixo laudioarra. Urkixok bizitzen ari diren egoeraren berri eman du berriki ARGIAn.  

Hamar atxilotu

Hilabete igaro da 200 pertsonatik gora hamar kamioi eta zazpi anbulantzietan Gazara abiatu zirenetik laguntza humanitarioa eramatera, Naizek jaso duenez. Mauritanian hasi zuten bidea, eta talde txikitan banatu dira. 

Erasoa jaso duen taldeak egunak daramatza Libiako ekialdea zeharkatu nahian, baina Libiako Indar Armatu Arabiarrek eta ekialdeko Libiako agintariek muga zeharkatzea eragotzi diete. Igandeko saiakeran, hamar kide atxilotu dituzte, Bengasi (Libia) hirira eraman eta deportatuko dituztenak, Berria-k jaso duenez.