Igandean agerraldia egin dute Sopelako 4ekin1 plataformako kideek auzia amaitu dela jakinarazteko. Auzia 2021ean hasi zen, Espainiako Poliziak lau sopeloztar atxilotu zituenean. Joko-aretoek gazteen osasunean eta herriko bizikidetzan duten eragina salatzen ari ziren mobilizazio “txiki eta baketsuan” atxilotu zituzten. Herri mugimenduko kideek akordioa egitea “koherentea” izan dela adierazi dute, bestela espetxeratuak izateko arriskua baitzegoen, Hirukak jaso duenez. 

Prozesua bost urte iraun dituen “amesgaiztoa” izan dela salatu dute. Bi aldiz artxibatua izan den arren, fiskalak aurrera ateratzea erabaki izan du. Ondorioz, lau herritarrak 32 urteko espetxe-zigorra eta 112.400 euroko isuna ordaintzeko arriskuan zebiltzan, militantzia politikoaren izenean. Mugimenduak adierazi duenez, “muntai polizial” bat antolatu zen eta modu “iruzurtian” izan ziren auzipetuak. 

Elkarretaratzean adierazi dute “pozik egoteko eta ospatzeko arrazoiak soberan” dituztela eta “borrokak dena alda dezakeela” frogatu dutela. Elkartasun “zabal eta indartsuari” esker auziarekin amaitzea lortu dela sinesten dute eta eskertuta azaldu dira bidean lagundu dieten milaka pertsonekin. Azaldu dute, jasotako laguntza ekonomikoaren zati bat antzeko egoerak pairatzen ari dira ondorengo taldeei bideratuko dietela: Berango Elkartasun Komiteari eta Aroztegiko kideei. Horrekin amaiera eman diote plataformari.