Sidenorrek bazekien Israelera bidalitako altzairua gerra-materialerako zela
Palestinar herriaren aurkako genozidio betean, 2024an, Sidenor enpresak altzairua saldu zion Israelgo armagintza enpresa bati. Poliziaren miaketak agerian utzi du gutxienez Sidenorreko zuzendarietako batek jakin bazekiela altzairua obusetarako erabiliko zela.
Comunitat Palestina de Catalunya elkarteak Sidenorreko hiru zuzendariren aurka jarritako kereilaren harira eta Espainiako Auzitegi Nazionalak aginduta, Espainiako Poliziak Sidenorren Basauriko (Bizkaia) egoitza miatu zuen otsaila honetan. Orain, RESCOP Palestinako okupazioaren aurkako elkartasun sareak jakitera eman duenez, miaketa horretan Iñigo Molero zuzendari komertzialaren email bat aurkitu dute, zeinetan zerrenda bat ageri den, altzairua zein enpresetara bidaliko den, eta tartean da IMI Systems enpresa israeldarra, oharra alboan duela: obusetarako altzairu horniketa. Israel Weapons Industries armagintza enpresa ere ageri da zerrendan.
Kontrabandoa eta genozidioarekiko konplizitatea leporatzen dio kereilak Sidenorri. Kontrabandoa frogatuta geratu dela uste du RESCOPeko abokatuak, aintzat hartuta Israelera egindako esportazio horiek Espainiako Gobernuari jakinarazi gabe eta baimenik jaso gabe egin zirela.
