Badira 21 urte Aulesti euskal arte eszenikoen zentro bilakatu zela, eta horrela izango da aurten ere: apirilaren 6tik 11ra 21. ADEL jardunaldiak izango dira. Barne eta kanpo begirada uztartzen ditu urteroko zita honek, antzerkizaleei begirako eskaintza zabala baitakar, baina baita aktore, zuzendari edo antzerkigileentzako ikastaroak ere.

Formol laborategiaren Heriotzak Eduardo du izena antzezlanak irekiko du aurtengo jarduna, apirilaren 6an. Horrez gain, beste zenbait antzezlan ere izango dira ikusgai: Idoia Tapia Martinezen Alter nation, Mairu Antzerki Tailerraren Pinpilinpauxa horiak edota Axut! Eta Artedramaren Nor naizen baneki, besteak beste. Egitarau osoa, hemen.

Oholtza gainean egongo direnek emango dituzte ikastaroak, arte eszenikoen askotariko ñabardurak lantzeko. Alter egoaz ariko da Maryse Urruty, “pertsona, aktorea eta pertsonaiaren arteko desberdintasunen” bila. Gorputza, ahotsa, irudia eta bestelako ideiak ere landuko dituzte Formol Laborategiko kideekin, Idoia Tapiarekin eta Nagore Tamayorekin. Oholtza biziaren isla gisa landuko dute Ximun Fuchsekin, eta, azkenik, Ander Lipus ArteDramaren sortzaileak herri antzerkia ekarriko du oholtzara.

Emanaldi guztietarako sarrerak salgai daude dagoeneko Aulestiko Ilunzar tabernan; ikastaroetarako matrikula jada itxi dute, eta Euskal Herri osoko hamasei lagunek eman dute izena.