Baionako rap taldeak irabazi du Italian antolatu duten Europako hizkuntza gutxituen sorkuntza garaikidearen jaialdia. Epaimahaiak taldearen "energia, adierazpen indarra eta oholtza gaineko presentzia" azpimarratu ditu.
Baionako RTZ kolektiboak du Suns Europe 2026 jaialdiko sari nagusia irabazi, eta taldearen eszena gaineko presentziaz haratago, "musikaren bidez gizarte gaiak jorratzeko duen gaitasuna" ere azpimarratu du epaimahaiak. Rap-a eta hainbat aldarrikapen uztartzen dituen taldea da, izan ere, Oph, Frel eta Petri artistek DJ Wall ekoizlearekin batera osatzen duten taldea. Etenaldi labur baten ondoren, Eden albumarekin itzuli dira aurten eszenatokira, hamasei kantuz osatua den bigarren lan luzea.
Suns Europe festibala 2009an sortu zuten, eta Europako hainbat hizkuntza minorizatuen arteko elkargune izateko xedea du, arte garaikidearen inguruan. Aurten urriaren 10ean jokatu da finala, Italiako Udine hiriko Teatro Nuovo Giovanni antzokian, eta guztira zazpi artista eta talde lehiatu dira. Hauek izan dira ordezkatuak izan diren hizkuntza gutxituak: euskara, friuliera, esloveniera, galegoa, sardiniera, katalana eta galesera. Publikoaren saria Kataluniako Ölivias taldeak eskuratu du, eta hizkuntza gutxituen aldeko lana aitortzen duen Altre Europe saria, berriz, Premio Ostana egitasmoak.
Etxepare institutuak hainbat urte daramatza Suns Europerekin lankidetzan, euskarazko musikaren eta sorkuntzaren nazioarteko presentzia sustatu asmoz. Aurreko edizioetan, besteak beste, Verde Prato (2025), MICE eta Niña Coyote eta Chico Tornado (2024), Ødei (2023) eta Olatz Salvador (2022) izan dira jaialdian parte hartu duten euskal
artistak.