'Irulegitik Pompelora. Hiri baten jatorriak' erakusketa jarri dute ikusgai ateak zabaldu berri dituen Pompelo Civivoxean. Erakusketaren izenburuak dioen bezala, bidaia bat proposatu du Aranzadi Zientzia Elkarteak Iruñeko Udalarekin elkarlanean mugarri erabakigarri bat irudikatzeko helburuz: gure aroaren aurreko I. mendean, herri baskoiaren bat egitea Erromatar Errepublikarekin.

Oro har, ikasketa prozesu bat izan da. Erakusketak balio izan du egindakoa jendeari erakusteko, baita orain artean ikusi gabeko piezak ikusgai jartzeko. Zazpi areto eta hiru garai bereizi dituzte eta horietan ikusgai daude txanponak, haiek egiten zituztenak, eta baita gerra materiala ere. Biak ala biak garaiko bizimodu eta ohituraren erakusleak. Gainera, “Irulegiko eskuaz gain idazketa uste genuena baino ohikoago zela” ikusteko balio izan duela nabarmendu du ikerlariak.

Hala ere, erakusketak duen gauza garrantzitsuenetako bat, eskala errealean birsortutako Irulegiko eskua aurkitu zen etxea da. "Ikerketa lan sakona garatu behar dugu horretarako eta sekulako prozesua izan da. Ikasketa prozesu bat izan da duela 2100 urte beraien eraikuntzak egiten zituzten bezala aritu garelako; eskuak zikindu ditugu", azaldu du Aiestaranek. Eta hori "polita" izan da.

Erakusketa ikusgai da dagoeneko eta irailaren 27ra arte bisitatu ahalko da Pompeloko Civivoxean, astelehenetik larunbatera, 11:30etik 13:30era eta 18:00etatik 20:30era.