Pizkundearen Korrika amaitu biharamunean agerraldia egin du AEKk Korrikaren 24. edizioaren lehen balorazioaren berri emateko. Pizkunde ezizena jarri diote, 24. edizioa pizkunde berrirako "txinparta" izan baita, horrela uste dute. Izan ere, Ane Elordi Korrikaren arduraduna, AEKko Nazio Kontseiluko kideak eta lekukoaren mezuaren zazpi egileak bat etorri dira aurtengo edizioak parte hartze "masiboa" izan duela, inoiz baino lekuko hartze gehiago izan dituena: 3.400. Elordik adierazi du “babes zabala” izan duela edizioak: “Ez da egon jende gutxiko kilometrorik”. Hauspo hori baliatuta,  12. eguna deituriko ekimenaren berri eman du Elordik eta “parte hartu duten eragile guztiei konpromisoa” eskatu die, lekukoa eramatearen “sinbolismotik” haratago, ordezkari politikoek haien “babes juridiko eta politikoa” eman dezaten eta “Korrikaren harira egindako adierazpen ederrak ekimen bihur” ditzaten, Korrikak “11 egun horietatik haratago” joan behar duelako. 

“Euskal Herri Euskalduna, horixe da gure gutxieneko hizkuntza-eskakizuna” azaldu dute igandean Bilbon eta asteleheneko balorazioan, eta euskararen etorkizunerako “guztioi dagokizun erantzukizuna” hartzea eskatu dute. Hori horrela, aipatu ekimenaren ildotik euskara ikasi eta praktikatzeko helburuarekin jarduera ezberdinak antolatu dituzte: apirilaren 22an doako ordubeteko eskolak antolatu dituzte 100 euskaltegitan euskara ikasten hasi direnentzat; eta maiatzaren 21ean berriz, 65 mintzodromo antolatu dituzte Euskal Herrian zehar. 

Elordik adierazi du Korrikak  “Iruñean egingo den ekainaren 13ko Euskaltzaleon Martxara begira" jarri dituela, eta “euskaltzaletasuna elikatzeko herritar bakoitzaren ekarpena ezinbestekoa” dela; “euskara garelako eta izango garelako”.