Azken urteetan osasun mentala oso barneratuta dago. Zorionez, psikologoarenera edo psikiatrarenera joatea gaur egun ez da “zoroen” gauza. Harritzekoa da orain pilulak edozertarako hartzea oso arrunta izatea.

Dirudienez, lagunekin pasadizoak kontatzen, psikiatrarenera joan diren lagun guztiei esan diete pilula bat hartzeko, eta gehien errepikatu dena Sertralina da. Hainbeste jendek hartzen du, non osasun mentalaren Parazetamola dirudien. Egia da kasu batzuetan benetan lagunduko duela, baina medikuarenera joaterakoan lehen konponbidea (edo bakarra) pilula hori hartzea bada, benetan gaixoei zer gertatzen zaien aztertu gabe… Agian ez da benetan osasun mentalean aurrerapenik egon.

Okerrena ez da “normalizatua” egotea edozergatik pilulak hartzea (mediku batek agintzen duelako), baizik eta, gizarte honetan, pilula bat hartzeagatik guztia ordu batzuetan konponduko dela uste izatea. Argi dago hori ez dela horrela, lan pertsonala egin behar da, garrantzitsuena da geure burua ezagutzea arazoak edo egoerak nola kudeatu jakiteko, eta askotan ez da egiten.

Ezin dugu etsi, adimen-osasunean gehiago ikertu behar da, baita bakoitza bere burua ezagutzeko ahaleginak egin ere. Konponbidea dago, baina konponbidea ez da pilula bat hartzea, nahiz eta hainbat kasutan lagundu izan.

Uxue Madariaga