“Elkar huts egin genuen udan…” horrela dio EHZk kaleratu duen oharrak. Ikasturte berriari ekin diote Euskal Herria Zuzenean-eko kideek eta herritarrekin hasi nahi dute kurtsoa.

Lehenengo hitzordua ostiral honetan jarri dute. Zea Mays, PiLT, Anestesia eta Biarritz Dance School taldeen musikaz gozatzeko aukera izango dute arratsaldeko zazpietatik aurrera Ezpeletara inguratzen direnek. PiLT taldearen azkeneko kontzertua izango da ostiralekoa eta Anestesiaren azkenaurrekoa. 8 eurotan jarri dute sarrera eta Helloasso atariaren bidez lortu daiteke.

Antolatzaileek gaineratu dute ez dela aurten egingo duten azken ekitaldia izango, eta beraz, adi egoteko hurrengo asteetan iragarriko dituzten ekimenei.