Osasun zerbitzuetan aldaketak iragarri zituzten asteartean Eusko Legebiltzarrean eta Osasun sailburuak esan zuen 17.000 pertsonari “osasun txartela” emango zitzaiela. ELAk salatu du aldaketa horiek "murrizketak" eragiten dituztela.

Sindikatuak azaldu du batetik, “osasun txartelak” ez duela osasun zerbitzu osoa bermatuko, “larrialdi zerbitzuak” baizik. Bestetik, gutxienez urtebetez erroldatuta ez bazaude edo Diru-sarrerak Bermatzeko Errentarik ez badaukazu, larrialdi zerbitzuak ere ordaindu egin beharko direla esan du.

Sindikatuaren hitzetan “onartezinak” dira aldaketa hauek: “Gizaki izate hutsak bermatu behar luke osasun zerbitzu unibertsala”.

Gaineratu du, aldaketak ez direla Espainiako Gobernutik etorri, eta beraz, Eusko Jaurlaritzak hartutako neurriak direla.

Atzera botatzeko eskaera

ELAk Eusko Jaurlaritzari eskatu dio aldaketak “bertan behera uzteko” eta “egoera guztietan” osasun zerbitzu unibertsala eskaintzeko.

Osakidetzako langileen kode deontologikoa arauen gainetik dagoela gogorarazi du sindikatuak, eta beraz, langileak osasun zerbitzu “osoa” ematera behartuta daudela esan du.