Donald Trumpek igandean iragarri du AEBetako Itsas Armada Ormuzeko itsasartea blokeatzen hasiko dela, Iranekin izandako elkarrizketek porrot egin ostean. Larunbatean hasi zituzten negoziaketak Islamabaden (Pakistan) AEBek eta Iranek, momentu oro kolokan egon den su etenari sendotasuna eman eta akordioak lortzeko helburuarekin. Bilerak 21 ordu iraun zuen, baina ez zuen emaitzarik eman.

Bi aldeek elkarri egotzi diote elkarrizketen porrotaren errua. AEBek nabarmendu dute beren lerro gorri nagusia Irango programa nuklearra dela, eta Irango ordezkaritzak, berriz, gerra kalteen konponketei, aktibo izoztuen askatzeari eta Ormuzeko itsasartearen kontrolari buruzko eskakizunei eutsi die.

Akordiorik ez izatearen ondorio gisa iragarri duTrumpek itsasartearen blokeoa, eta helburu izango ditu Irango portuak jatorri edo helmuga dituzten ontziak. Washingtonek ohartarazi du, halaber, itsasartea zeharkatzeko Irani bidesariak ordaindu dizkioten ontziak atzemango dituela, eta gainera, Iranek itsasartean jarri dituen minak suntsituko dituela. Pentagonoak adierazi du Ormuzeko blokeoa astelehen honetan hasiko dela, Euskal Herrian 16:00ak direnean.

AEBen blokeoaren iragarpenari erantzunez, Irango Guardia Iraultzaileak esan du edozein ontzi militar Ormuzeko itsasartera hurbiltzen bada, su-etenaren “urraketatzat” hartuko duela, eta “irmotasunez” egingo diotela aurre.

Ormuzko itsasartearen auziak berebiziko garrantzia hartu du Ekialde Hurbileko gerran, munduko ekonomian eragina duelako. Bertatik 20 milioi upel inguru pasatu ziren bertatik egunero 2024an, munduko petrolio kontsumoaren % 20 inguru. Gainera, bide horretatik gas natural likidotuaren munduko merkataritzaren bosten bat inguru igarotzen da.