Naparraren gorpua aurkitzeko bide berriak ireki nahian

  • Iñaki Errazkinek auzia berriz irekitzera eraman zuen iturriaren bideo bat zabaldu du; gorpua bi lekutan egon daiteke eta bakarrean bilatu dute.

Artikulu hau CC BY-SA 3.0 lizentziari esker ekarri dugu.

2018ko apirilaren 17an - 08:54

Urtea joan da Frantziako Gendarmeriak Mont de Marsan inguruko paraje batean Jose Migel Etxeberria Naparraren gorpua bilatu zuenetik. Ez zuten ezer topatu. Ordutik urtea joan da, beste bat, Naparra desagertu zela 38 urte pasa dira eta. Familiaren eskaera beti bera izan da, «egia nahi dugu, zer gertatu zen, zergatik... Hortik etorriko diren zigorrak eta abar, ongietorriak izango dira, baina guk nahi duguna egia da, ez besterik», dio Eneko Etxeberria anaiak.

Hori eskaera orokorra da, bi eskaera zehatz ere baditu eta familiak: batetik, gorpua Landetako bi lekutan egon liteke Pako Etxeberria forentsearen arabera, batean begiratu dute, bigarrenean ere bilaketa egitea nahi du familiak eta, bestetik, kasua ez ixtea eskatzen dute.

Bi eskaera horiek lehen bilaketa egin eta urtebetera berretsi du familiak, publikoki, eta hori dela eta Iñaki Errazkinen laguntza jaso dute, beste behin. Izan ere, kazetaria izan zen CESIDeko kide ohiaren testigantza jaso zuena eta horri esker ireki zuten berriz ere kasua. Testigantza hori Iñigo Iruin familiako abokatuari pasa eta bere bitartez, eta Pako Etxeberriaren laguntzarekin, lortu zuten epaitegietan kasua berriz ere irekitzea. Bilaketa ez dute muturrera eraman hala ere, eta horregatik erabaki zuen Iñaki Errazkinek pasa den astean bere iturriaren bideo bat publiko egitea. CESIDeko kide ohia Ramon Arnau de la Nuez da eta Youtube bidez zabaldu zuen bideoan hainbat gairen artean, Naparrarena aipatzen du.

«Bideoa lehen bilaketa hura baino lehenagokoa da», zehaztu du Errazkinek. «Brasilen grabatu nuen 2015eko abendua inguruan. Tipo hori nirekin jarri zen harremanetan, e-mail bidez, informazio bat konpartitu nahi zuela esanez. Hasieran ez nion kasu gehiegirik egin, baina gero, nik ere nire ikerketa txikia egin eta gero, kasu egitea erabaki nuen eta Brasilera joan nintzen berarekin biltzeko», azaldu du. CESIDeko kide ohia Brasilen zegoen orduan, justiziatik ihesi antza, baina gaur egun leku ezezagunean dago. «Astebete egon ginen elkarrekin. Pila bat informazio eman zidan eta guztia grabatu nuen, dena audioan eta gauza batzuk bideoan. Egia esan ez nekien Naparraz hitz egingo zidala, beste gai asko izan genituen hizpide», esan du. Grabaketetako azken egunean eman zion Naparraren berri, «opari» bezala, esan zion Errazkini. «Momentuan bertan orri bat atera eta idatziz Naparraren gorpua dagoen ustezko lekuaren eskema egin zidan, xehe-xehe. Egia esan ez zidan Naparra zela ere esan, nik Pertur izan zitekeela pentsatu nuen».

Errazkin Brasiletik itzuli eta Iñigo Iruin Etxeberria familiako abokatuarekin hitz egin zuen. «Pako Etxeberriarekin hitz egin genuen, proba asko egin genituen... eta kontatutakoari sinesgarritasuna eman genion». 2016an joan ziren Landetara iturriak emandako datuak jarraituz, eta horiek ikusita Pako Etxeberriak gorpua bi lekutan egon zitekeela ondorioztatu zuen.

Bi leku posible eta bilaketa bakarra. Datu eta informazio hori guztia epaitegietara eraman zuten eta Auzitegi Nazionaleko Ismael Moreno epaileak kasua berriz ere irekitzea erabaki zuen. Frantziako justiziarekin harremanetan, bilaketa egitea erabaki zuten, baina leku posibleetako bakarrean. Errazkin ez zen egon bilaketa egin zutenean, «baina jakin badakit» bilaketa ez zela oso sakona izan, esan du. Eta bigarren lekua ez dute ukitu ere egin. «Ez ginen gustura geratu eta Pako Etxeberriak proposatutako bigarren leku horretan bilaketa egitea eskatzen dugu», esan du Eneko Etxeberriak.

Eskaera Auzitegi Nazionalean dago eta aztertzen ari dira. Ez dute erantzunik jaso oraindik. Ez da erantzunik jaso ez duen eskaera bakarra. CESIDeko kide ohiak deklaratzea nahi du ere familiak, baina hori ere geldirik dago.

Albiste hau Tolosaldeko Atariak argitaratu du eta CC-by-sa lizentziari esker ekarri dugu ARGIAra.


Kanal honetatik interesatuko zaizu: Historia
Materialismo histerikoa
"Mario Lopez" eta "Gernika"

Krimen matxistak, mediatizatzen direnean, emakumeontzat lezio bilakatu ohi dira, eta bizirik badago, biktimarentzat. Nerea Barjola ikertzaileak Alcasserko kasuaren bidez azaldu zigun hori. Eta Nagore Laffageren hilketak ere lezio astun bilakatzeko arriskua izan zuen, lezioa... [+]


Jokin Pantxeska Etxebarria. Gerrako ume, aitaita
"Hiru aldiz esan dute gorria naizela, komunista!"

Irisarriko herrigunera sartu orduko, hantxe, etxe baten atarian, ikurrina eta estelada. Jokin Etxebarriaren bizitokia duzu. Gerrako ume izandakoa, hamaika ibilera –eta hamaika baino gehiago ere bai–, han eta hemen egindakoa. 92 urtek nahi beste bizitzeko aukera... [+]


Nabigazioaren historiaren argazkia

2019an, Greziako Kasos uharteko uretan, ikerlan bat abiatu zuten Ikerketa Helenikoen Fundazio Nazionalak eta Greziako Kultura Ministerioak. Lanaren emaitza berriki jakinarazi dute: guztira, hainbat garaitako hamar ontzi-hondar aurkitu dituzte. Zaharrenak 5.000 urte inguru ditu... [+]


Fra Mauroren mundu zehatzagoa

Venezia, 1459ko apirilaren 24a. Fra Mauro monje eta kartografoak bere munduko mapa amaitu zuen San Michele de Murano monasterioan zeukan kartografia tailerrean. Portugalgo errege Alfontso V.aren enkarguz egin zuen lan hura, eta, mapa amaitu bezain pronto, Portugalera bidali... [+]


Artoaren iraultza: Ameriketatik etorritako ogia

 Hainbat herritan antolatzen diren sagardo egunetatik hasi eta neguko solstizioa zedarritzen duen San Tomas feriaraino, artoa ezinbesteko osagaia da folklore-kutsua duen ospakizun orotan. Nonahi ikus daitezke talogileen postuak, olanazko estalkietatik zintzilik jarritako... [+]


Eguneraketa berriak daude