Nafarroako Foru Eraentza Berrezarri eta Hobetzeari buruzko Espainiako 13/1982 Lege Organikoak edo Nafarroako Foru Hobekuntzak euskara "berezko hizkuntza" gisa aitortzea proposatu du ostegunean Chivitek, Nafarroako Parlamentuko osoko bilkuran iragarri duenez, PSNren galdera bati erantzunez.

Proposamen hori lege organikoaren eguneratzea aztertzen ari den Parlamentuko ponentzian egingo du Nafarroako lehendakariak. "Ziur naiz gizarte gisa gainditu egin dugula etapa bat non euskarak agian konnotazio politikoagoak zituen sozialak baino".

Chivitek euskara hezkuntza-sare osoan ofiziala izatea proposatu du, batetik, gaur egun euskara "bizikidetzaren esparruan normaltasun osoz" hautematen delako Nafarroan; eta, bestetik, hezkuntzak "paper garrantzitsua" izan behar duelako, eta euskara "ezagutza-faktorea" delako. "Ez dago mugarik hezkuntza publikoa elementu transmisore bihurtzen denean", adierazi du. Gaineratu duenez, modu horretan Kontseiluak pasa den larunbatean Iruñean deitutako mobilizazioan egindako eskaerari heldu dio, instituzioei eskatu zitzaien heinean euskaraz bizi ahal izateko beharrezko baliabide guztiak jartzeko.

Bestetik, PSNko bozeramaile Ainhoa Unzuk adierazi du alderdiak bat egiten duela Chivitek iragarritakoarekin, "euskara ez dagokiolako ideologia bati, eta ez delako soilik Nafarroako parte baten ondarea". "Gure erkidegoko hizkuntza propio gisa ulertu behar dugu eta, hain justu horregatik, baita elkartzen gaituen elementu bezala ere".