Esan dudan bezala, Hamabostaldi hau "kontzentratuagoa" da. Abuztuan bederatzi kontzertu izango ditugu Kursaal Auditorioko Zikloan. Egia esan, gehiago hurbiltzen ari gara jatorrizko hamabostaldiaren kontzeptura, urteetan garatu den kontzeptura baino: hamabostaldiarena izena zen, baina jaialdia hilabetean zetzan, musika hitzorduz josita. Nolanahi ere, uste dut denok mugitzen gaituela kalitateak kantitateak baino gehiago, eta, horregatik, Hamabostaldiaren edizio honek poz dezente emango digula uste dut.

Bisitatuko gaituzten maila handiko nazioarteko orkestrak eta entzun ahal izango ditugun bakarlari benetan karismatikoak aipatze hutsarekin, edizio honen mailaz ohartuko gara.

Orkestrei dagokienez, ohi bezala, Euskadiko Orkestra entzuteaz gain, Mahler Chamber Orchestra-k abuztuaren 6an, Daniel Hardingen zuzendaritzapean, emango duen kontzertura joateko plazera izango dugu. Bestalde, Seoul Philharmonic Orchestra-k bi kontzertu eskainiko dizkigu, eta Kursaal zikloari amaiera emango dion orkestra Milango Scalako Filarmonikoa izango da, Riccardo Chaillyren gidaritzapean, bi kontzerturekin. Eta ezin aipatu gabe utzi The Constellation Choir and Orchestra, Sir John Elliot Gardiner buru duela. Apustu seguruak, beraz. Arriskurik gabe.

Eta aho zabalik utziko gaituzten bakarlariei dagokienez, hiru aipatu behar ditut, inola ere galduko ez ditudanak. Lehenik eta behin, Juan Diego Flórez tenoreak, nazioarteko panoraman handienetako batek, errezitaldia eskainiko du abuztuaren 2an, aurtengo edizioari hasiera emateko. Kursaalera ere hurbildu behar dugu munduko piano-jole onenetako bi entzutera, bakoitza bere belaunaldian. Alde batetik, Daniil Trifonov, Errusiako piano eskolako belaunaldi berrien adierazlerik onenetakoa da. Mahler Orchestra-rekin batera entzungo dugu, abuztuaren 6an. Bestalde, Grigory Sokolov beteranoak bere magian eta poesian murgilduko gaitu hilaren 13an.

Ez dut itxiko Musika Hamabostaldian kontuan hartu beharreko hitzordu interesgarrien zerrenda hau jaialdi honetako beste ziklo batzuetako bi kontzertu aipatu gabe.

Egia esan, balio bereko bitxiak aurki ditzakegu jaialdiaren beste ziklo batzuetan. Eta probatzeko, orain komentatuko ditudan kontzertuak. Victoria Eugenia Antzokiaren zikloaren barruan, abuztuaren 12an ezinbesteko hitzordu bat dugula uste dut: Euskadiko Orkestraren kontzertua Easo Abesbatzarekin batera, Juanjo Mena-ren zuzendaritzapean. Egitaraua gure konpositore handienetako bati eskainita dago: Juan Crisostomo Arriagari. Arriaga harrigarria izenburupean, Hamabostaldiak omenaldia eskaini nahi dio konpositore honi bere heriotzaren 200. urteurrenean. Jar ezazue data hori egutegian, beraz.

Eta amaitzeko, Hamabostaldia Arantzazun zikloaren barruan, Natxo de Felipe ere ezin dugu galdu bere NEF & Kuarteto Philiperena taldearekin. Oskorriren abesti argitaragabeak aurkituko ditugu, inoiz grabatu edo interpretatu gabeak. Sorpresa bat, beraz.

Laburbilduz, bakarlari distiratsuak, orkestra onak, programa murriztua, sorpresa gutxi eta kalitatea ziurtatuta. Zatozte Musika Hamabostaldira.