Azterketei tokiko hizkuntza gutxituetan erantzun ahal izateko bidean aitzinamenduak egiteko prest direla jakitera eman die Edouard Geffray Hezkuntza ministroak Paul Molac eta Peio Dufau diputatuei –lehena bretoia, eta bigarrena, EH Baiko kidea–. Zehazki, "murgiltze ereduko irakaskuntza salbuespen erregimen batetik ateratzeko lege-marko berria" aurkezteko konpromisoa hartu du ministroak, eta baliteke horretan sartzea azterketak euskaraz –eta oro har, lekuko hizkuntza gutxituetan– pasatzeko aukera. "Eskualdeko hizkuntzako azterketen gai zehatzari dagokionez, badirudi ministroak adierazitako haserrea entzun duela, batez ere Euskal Herrian", irakurri daiteke diputatuek helaraziriko agirian.

Maiatzaren 21 honetan izan dute bilera hori, eta lege-kuadro hori "ondoko egunetan ofizializatzeko" konpromiso argia jakinarazi die Geffrayk Eskualdeetako Hizkuntza eta Kultura Ikerketarako Legebiltzarreko Batzordearen ordezkariei.

Urtero bezala gatazka iturri dira azterketak, euskaraz ikasi arren, ondotik erdaraz aurkeztu behar dituztelako azterketak. Protesta gisa desobedientziaren hautua egin berri dute Baionako Bernat Etxepare lizeoko ikasleek: matematikako baxoa euskaraz egingo dutela jakitera eman zuten maiatza hastapenean, komunikabideen aitzinean egindako agerraldian. Irakasle andanaren babesa ere badute, ikastoletako, eredu publikoko zein pribatuko 175 irakaslek dutela azterketa horiek zuzentzeko ardura publikoki hartu. Ekainaren 6an eginen dute protesta Bordaleko errektoregotzaren aitzinean.

50 bat diputaturen babesa

Hainbat alderdiren 50 bat diputatuk babesturiko gutuna helarazi diote Molacek eta Dufauk hezkuntza ministroari. Murgiltze ereduari bideratu beharreko baliabideen "berrazterketa urgentea" egitea galdetzen diote, eta oro har, hizkuntza gutxituen garapena oztopatzen duten "administrazio-blokeoen" bukaera ere.